Lider di fraccion AVP, mr. Mike Eman: Gabinete Wever ta ignora realidad doloroso di pueblo!

Despues cu gremio comercial a reuni diabierna ultimo cu comision financiero-economico di Parlamento di Aruba, na careda a yama un reunion tambe cu Minister di Finanzas, Xiomara Maduro, pa dialuna mainta. Hunto cu expertonan di Departamento di Impuesto y Aduana, e mandatario a ignora importancia na e preocupacion comercio. E mandatario a pinta un realidad imaginario y contrario na e realidad doloroso di pueblo. Den e mundo di Xiomara Ruiz Maduro, e economia di Aruba ta bayendo bon; y cu e 7% cu Gabinete Wever-Croes ta bay impone e luna aki, no lo tin un efecto riba e cartera di e Arubiano. Esey ta e impresion cu lider di fraccion di Partido di Pueblo Arubano (AVP), mr. Mike Eman a saca for di e reunion.

Ora cu a haya e convocacion diabierna atardi, Eman a spera cu lo tabatin pregunta fuerte y al caso di parti di e miembronan di coalicion, sinembargo, esnan cu ta sostene Gabinete Wever Croes a participa cu Minister Maduro cu a mustra cu tur cos ta ‘koek en ei’ na Aruba. “Ami ta kere cu nos ta biba den dos diferente pais,” e lider di oposicion, mr. Mike Eman a expresa.

Esey ta paso siman pasa Camara di Comercio y ATIA, AHATA, SNBA, AFBA, Comerciantenan Unie Aruba (CUA) y algun experto di accounting a mustra con devastador e 7% aki ta bay ta pa nos consumidor, pa empresa, pa hotel, pa restaurant, pa turismo, costo di bida y pa e clima di inversion. P’esey mes e lider di oposicion si tabatin algun pregunta pa Minister Maduro; pregunta manera si e ta kere lo yega na un punto di saturacion caminda pueblo no tin mas pa duna, na loke e mandatario a bisa cu e no ta kere pasobra IMF a bisa cu economia ta creciendo.

Eman: “Na 2018 a redobla BBO, despues a aument’e di 6% pa 7% y nan ta hayando 300 miyon mas pa aña cu e gobierno anterior cu si tabata drecha scol, bario, caretera, hospital, muda waf, drecha caya grandi y centro di ciudad. E mesun gobierno si a duna un inhaalmaneouvre, un indexering, un reparatietoeslag.” E parlamentario ta kere cu mester tin un bari sin fondo caminda 300 miyon florin ta disparce pasobra no ta mir’e cerca nos pueblo, no ta mir’e na infrastructura, ni na scol. Al contrario awor ta cera scol, ta cobra schoolgeld barbaro, ta kita remedi di nos grandinan y ta sigui impone medida.

Nos tin un gobierno cu pa drecha un trapi na Seroe Colorado shete minister ta bay para eynan pa saca potret, mientras cu esey ta e tipo di proyecto cu den gobernacion di AVP tabata haci hunto cu oficina di Bo Bario y boluntarionan rond di Aruba riba cualkier diasabra, pero den Gabinete Wever-Croes I y II, esey ta e proyecto mas importante cu Aruba tin.

Y mientras mandatario na Aruba ta sconde tras di IMF, mientras Banco Central di Aruba si ta zonando tur alarma. Fuera di e conseho negativo di Raad van Advies, BCA ta indica cu consumo lo baha simplemente pasobra e ciudadano no tin placa mas. Ta alerta riba e indice di inflacion, mas e 7% di BBO na frontera, mas e tripel 7% di BBO regular cu lo haci producto y servicio impagabel. Sin menciona e efecto cu lo tin riba turismo caminda ya por a registra un caida den e porcentahe di ocupacion.

E realidad ta cu comercio no tin otro opcion cu aumenta su prijs. Esey ta pasobra nan mester bay paga interes riba cen fia pa paga gobierno di adelanta, sin sa ki ora lo hay’e bek na restitutie of si lo hay’e mes, cual den algun caso, no ta bin na remarca pa hay’e bek. Otro preocupacion ta si lo haci verrekening cune. Cu si nan tin un debe cu nan no a pone un disputa riba dje ainda, DIMP por pasa e restitucion eynan. Pero nada di esey ta preocupa e minister pasobra IMF supuestamente a bisa cu economia ta bon.

Mas aleu Banco Central di Aruba a indica cu e echo cu hendenan tin cu paga pa nan remedi tambe ta haci cu nan tin menos placa pa cumpra otro cos. “Banco Central den edificionan hermetico sigura ta mira esaki, pero un politico cu ta suppose di cana den e pueblo y scucha e pueblo y sa e dolor di e pueblo, ta bisa cu e no ta sinti’e,” mr. Mike Eman a cuestiona.

E lider di oposicion, mr. Mike Eman ta conclui cu henter e pensamento cu bo por keda impone medida y cu e no ta bay tin un impacto riba bo economia y pueblo, ta un pensamento hopi robes di hendenan cu solamente ta biba den un “bubble”, pero no ta wak e realidad cu nos ciudadanonan ta pasando aden.