Para dilanti e ekipo di docente, rector y nan mayornan y famia, e candidatonan di Filomena College MAVO a presenta nan mes dilanti e escenario, unda nan a haya un bunita sorpresa ora a bin haya sa cu en berdad nan a gradua.
Ayera 5or di atardi, studiantenan den examenklas di Filomena College MAVO a presenta hunto cu nan mayornan y famia na scol pa asina por haya sa si nan a slaag of no. Yena cu ansiedad pero tambe cu hopi emocion, e candidatonan a ser yama pa e rector pa para dilanti pa asina por haya e anuncio masha spera.
E atardi a cuminsa prome cu resamento, guia pa Lila Richardson, mentordocent di e 1e klassers. Despues a cuminsa mesora cu e anuncio di graduadonan, cual tabata lidera pa e rector di scol, R. Lampe. Pa por anuncia e noticia, prome el a yama na tur candidato pa presenta nan mes dilanti trapi di plein y colecta un caha cera cu nan nomber riba dje. Eyden nan lo tin nan contesta tan spera.
Despues di un conteo di 10, e studiantenan a habri nan caha y a mira un strea color di oro: nan a slaag. Grito a explota den aire, studiantenan bulando cu felicidad. Mama y tata brasando yiu cu lagrima den wowo pa via di e emocion di felicidad tan fuerte. Asina e candidatonan a experencia e bunita sorpresa cu e bon noticia. Despues cu e emocionnan a baha un tiki, e rector a continua cu e anuncio di e muchanan “best geslaagde”, sigui pa un nombramento di cada graduado pa asina nan tambe por haya nan momento pa briya y tuma potret.
E best geslaagde di e aña aki a bay pa Mauro Geerman di 16 aña. Un adolescente hopi independiente, balente y sabi, Mauro semper tabata un bon studiante. Ora a papia cune un rato despues di a ser anuncia como best geslaagde, Mauro a conta cu e proceso di studia pa su SE y examen tabata un basta pisa, pero asina mes el a sigui haci su best. Su mayornan y rumannan ta sumamente orguyoso di dje, pero no sorprendi di su exito, ya cu nan sa bon bon con duro el a traha pa e logro aki.
Masha pabien Mauro cu bo logro y ademas un pabien grandi nan tur graduado di Filomena College MAVO. Hopi exito pa boso siguiente stap den boso carera academico!
