91% di alumno den examenklas di Colegio San Antonio a slaag

Ayera atardi diferente scol avansa rond di Aruba a tene nan uitslag dag, dia di resultado di e studiantenan cu a gradua y Colegio San Antonio tabata un di e scolnan cu a celebra e logro di su studiantenan cu a gradua. Reportero di Bon Dia a combersa cu Gershwin Lee, director di Colegio San Antonio, ken a conta di e porcentahe di graduado y con e aña escolar a bay den su totalidad.

Lee a indica cu e aña aki Colegio San Antonio tabatin un grupo di casi 100 alumno di examenklas. Seis di e alumnonan aki, pa diferente motibo, no a yega na examen y 94 alumno a traha nan examen.

“E tabata un aña cu hopi reto pa e alumnonan den nan ambito personal, un tiki desafio cu motivacion, pero tambe cu docentenan den area personal etc. Mi ta increiblemente agradecido pa tur nan esfuerso y danki na e esfuerso aki nos por bisa cu nos tin 91% di graduado den e prome ronde,” director Lee a remarca.

Compara cu aña pasa e porcentahe ta mas halto ya cu aña pasa e cifra tabata bao di 80%, pero esaki, segun e director ta indica, tabata pa motibo di un situacion diferente mirando cu ainda tabatin COVID-19 y tabatin cierto cambionan debi na COVID-19. El a remarca cu nan a laga tur alumno haci herkansing prome cu aplica tur e cambionan cu nan tabata por a aplica door di covid.

“Semper nos ta contento cu e logro di nos alumnonan. Cada un tin nan retonan personal, cada un tin nan desafionan y e bunita ta cu na final nos por celebra cu nan ta logra y e ta danki na esfuerso di mayor, danki na esfuerso di docente, danki na esfuerso di e mentornan, danki na esfuerso di e alumnonan mes cu ta traha den grupo cu nos por tin resultadonan cu ta laga nos bira contento,” el a agrega.

Director Lee a enfatisa cu semper nan tin un grupo di alumno cu tin cuido special pa nan. El a splica cu nan tin alumnonan cu por cay den spectrum di autismo, tin alumno cu dislexia, cual tabata e caso e aña aki y como scol nan semper ta zorg pa e alumnonan aki tambe por logra yega e meta final. “Awe atrobe nos tin un grupo di alumno cu danki na esfuerso di nos docentenan cu ta gradua awe.”

Pa loke ta e seis alumnonan cu no a logra cay den e grupo di graduadonan, Lee ta splica cu tres di e alumnonan aki ta pa motibo di malesa durante examen y e otro tres a stop e aña escolar prome cu el a termina pa motibonan fuera di lo previsto, pero otro aña nan lo continua nan examenjaar.