(AP) — Hurado den corte federal a otorga $25.6 miyon na un ex-manager regional di Starbucks kende a alega cu e y otro empleadonan blanco a ser castiga inhustamente despues di e aresto di perfil halto di dos homber color scur na Philadelphia na 2018.
Shannon Phillips a gana $600mil den dañonan compensatorio y $25 miyon den daño punitivo e siman aki despues cu un hurado na New Jersey a haya cu rasa tabata un factor determinante den retiro di Phillips, den violacion di leynan anti-discriminacion federal y estatal, segun Law360 ta reporta.
Na april 2018, un manager di tienda na Philadelphia a yama polis riba dos homber color scur kende tabata sinta den e koffie shop sin bestel nada. Phillips, kende e tempo ey tabata manager regional di operacion na Philadelphia, sur di New Jersey y otro areanan, no tabata involucra den e arestonan pero a perde su trabao menos cu un luna despues di nenga di suspende otro manager blanco memey di indignacion, segun su demanda.
E rasonamento di e compania pa suspende e manager di districto, kende no tabata responsable pa e tienda unda e aresto a tuma lugar, tabata un acusacion cu managernan di tienda color scur tabata ser paga menos cu managernan blanco, segun e demanda. Phillips a bisa cu e argumento aki ta sin base pasobra mangernan di districto no tin influencia riba salario di empleadonan.
E demanda a alega cu Starbucks tabata tumando stapnan pa “castiga empleadonan blanco” cu tabata traha den e area “den un esfuerso pa convence e comunidad cu a responde adecuadamente na e incidente.”
Starbucks a nenga di duna comentario diamars.
Den e incidente na april di 2018, Rashon Nelson y Donte Robinson a keda aresta na un Starbucks cerca di Rittenhouse Square na Philadelphia tiki despues cu e manager a yama polis pa reporta cu dos homber tabata nenga di sea haci un compra of bandona e sitio. Despues nan a keda liber sin cargo.
Video di e aresto a conduci na indignacion nacional y a pone e CEO actual di Starbucks pidi disculpa personalmente na e hombernan. Despues e compania a yega na un areglo cu ambos persona pa un suma no revela y un oferta pa educacion universitario gratis. E compania tambe a cambia politica na su tiendanan y a cera tiendanan na e pais pa un anochi pa training di prehuicio racial.
