Kier duna espacio na ekipo local pa guia e reformanan conforme e contexto di Aruba

Den e siman di 22 di mei te cu 2 di juni, TWO-Aruba conhuntamente cu TWO-Hulanda a traha riba e agenda di ehecucion pa e di tres kwartaal di 2023. Durante bishita di trabou di TWO-Hulanda a para keto na diferente tema, entre otro: enseñansa, crecemento economico, reforma economico, mercado laboral y seguridad social.

Segun un comunicado di gobierno, e bishita aki tabata uno sumamente intenso caminda no solamente a traha riba e agenda di ehecucion, pero a sinta hunto cu diferente experto y lidernan di proyecto pa haya un mihor bista di kico ta e vision di Pais Aruba pa cu e diferente temanan aki.

Mester bisa cu e combersacionnan tocante e contenido di e reformanan cu mester tuma luga tabata basta intenso. Miembronan di TWO-Aruba a trece dilanti e vision di Pais Aruba y a splica cu tin elementonan esencial pa e vision aki. Di parti di Hulanda a intercambia experticio riba e temanan y asina a yega na conclusionnan comun. Por bisa cu e tema di ‘ownership’ ta keda un tema hopi valido pa pais caminda cu kier duna espacio na e ekipo local pa guia e reformanan conforme e contexto di Aruba. Esaki a base di capacidad di ehecucion y necesidad di priorisa e reformanan. Pais Aruba y Hulanda lo sigui den combersacion cu otro riba e tema aki.

Pa locual ta e di tres agenda di ehecucion, actualmente e enfoke ta hopi mas riba formula resultado concreto. Un otro punto di atencion ta e efecto colectivo di e trayectonan di implementacion cual ta un tema cu ta keda wordo trata riba nivel di organisacionnan.

TWO-Hulanda a indica cu pa nan e ta keda importante pa e reformanan wordo ehecuta den forma diligente cu e mesun energia cu e reformanan a wordo ehecuta na inicio di e proceso, y semper den bon cooperacion.

Adicionalmente por indica cu esaki ta prome biaha cu a traha conforme e acuerdo mutuo nobo firma dia 4 di april 2023. Ta papia di un posicion hopi mas balansa entre paisnan, cu enfoke riba respeta posicion di e paisnan y nan autonomia. Den transcurso di aña lo sigui traha riba e siguiente agenda di ehecucion y asina crea un proceso mas balansa teniendo na cuenta e meta principal cual ta, pa crea un Aruba mas resiliente.