Den nos edicion anterior di Bon Dia Aruba a introduci e rapport “Level Playing Field”. Un rapport cu a ser comisiona pa 17 stakeholder y a ser realisa pa un comite di tres experto na unda a trece pa dilanti diferente recomendacion pa loke ta trata e reforma fiscal, e introduccion di BTW e tempo ey, cual a keda reemplasa pa BBO na frontera.
Despues di e cambio di parti di Gobierno di Aruba pa no introduci BTW mas, pero mas bien a opta pa introduci BBO na frontera, Camara di Comercio Aruba a indica cu no tur recomendacion y conclusion presenta den e rapport ta conta cu aprobacion di tur stakeholder. Esaki, nan a sigui splica, ta pa motibo cu e rapport a ser elabora pa e introduccion di BTW y no di BBO na frontera, locual a trece cune cu algun di e recomendacionnan, segun Camara di Comercio, no ta cuadra mas.
E rapport a presenta 17 recomendacion y ta un esfuerso pa brinda alternativanan viabel pa diversifica y extende e fuentenan di ganashi di e sector publico, pa aumenta e parti di e sectornan cu ta contribui menos y crea un igualdad di condicionnan pa e participantenan den e economia di Aruba, tanto pa negoshi como pa e consumidor.
E rapport aki ta menciona tambe e reduccion di tarifanan unda esakinan por ta excesivo of creando distorsion no desea den economia y cu ta haci control di cumplimento hopi dificil pa e sector publico. Tur esaki cu e meta di limita e impacto inminente riba e costo di bida pa e habitante- y bishitantenan.
E comite ta enfatisa cu e control y disminucion di gasto publico ta urgente y mester complementa e ultimo esfuerso di reforma pa yega na e metanan menciona.
Gremio comercional y sindical ta spera cu aworaki Gobierno di Aruba ta trece pa dilanti un control di gasto concreto y irevocabel, cambionan legal y di politica pa mitiga burocracia, mehora servicio y innovacion tecnico pa ofrece servicionan mas lihe, miho y economico na comunidad.
E comite encarga cu e rapport aki a splica cu durante e reunionnan cu gremio comercial y sindical, tres tema importante a ser treci pa dilanti. Uno, no tabatin un imagen completo di e reforma fiscal pa e caida di poder di compra; dos, cumplimento por wordo mehora den diferente dominio aumentando asina e ganashi pa Gobierno di Aruba; y tres, e crueldad den mayoria di proceduranan pa pidi permiso cu Gobierno di Aruba.
BBO cu un tarifa na frontera
Como prome recomendacion comercio y gremio sindical ta indica cu e tarifa aki cu lo ser realisa na frontera riba importacionnan cu ta cualifica y cu ta deducibel for di e BBO cobra pa e siguiente ciclo di e cumprado for di e bendedo, pa e creacion di un sistema di impuesto indirecto mas compatibel y igualdad di condicion pa comercio y industria.
Despues di pandemia un parti grandi di poblacion a mantene un habito regular di compra online. Un parti significante di e companianan priva grandi den e economia local, manera supermercado y hotel, ta cumpra regularmente for di e distribuidor afo. Esaki ta un faya economico pa importador y distribuidor local manteniendo productonan den stock determina pa BBO.
Finalmente minorista- y mayoristanan y distribuidornan no tin un condicion di igualdad cu e comprasnan online y importacion directo pa compania- of individualnan.
BBO na frontera ta crea condicionnan mas igual y ganashi adicional di compra ta bay tin e mesun cumplimento cu minoritsa y mayorista di productonan den stock cu implementacion di BBO recauda na frontera y inmediatamente deducibel for di BBO cobra ariba recibonan di benta.
E comite a haya apoyo unanime pa e modelo aki di BBO cu solamente un nivel di deduccion di BBO recauda pa Douane na frontera. Nan ta remarca cu lo ta mas simpel pa tur pa introduci un modelo di BBO completo, unda BBO paga pa proveedornan local por wordo deduci.
Consecuentemente e BBO cu mester wordo deduci ta wordo provee pa DIMP y/of e Departamento di Douanne den nan red na momento di haci presentacion online, mescos cu e BBO actual. E cantidad paga na frontera ta warda den e sistema ASYCUDA di Douane.
Impuesto di importacion di vehiculo, incentivo fiscal pa uso di autonan electrico di parti di empresanan
Den e caso di vehiculonan, e tarifanan di 30%, 40% y 50% a pusha un porcion grandi di e poblacion pa cumpra autonan mas barata cu stuur na banda drechi (right hand drive). E impuesto super halto a obstaculisa e mercado local pa autonan di segunda mano, mientras cu e autonan nobo no por wordo paga mas pa un segmento grandi di entrada, hasta cu un prestamo di banco pa financia un parti di e auto.
Distribuidornan local a ser afecta grandemente y por supuesto e calidad di bida di e poblacion, door di e compra di autonan di segunda mano cu ta causa contaminacion halto cu problemanan mecanico cu eventualmente lo surgi, e gasto ta mas halto cu ora cu cumpra un auto nobo.
E comite ta compronde cu e Departamento di Douanne Aruba a evalua e reduccion di impuesto di importacion riba auto pa 28%. Como segundo recomendacion, gremio comercial y sindical ta apoya e desaroyo aki y ta encurasha pa e wordo implementa pronto. Sugerencia pa otro modelnan ta 2% pa autonan completamente electrico y 5% pa autonan hybrid.
Nan ta enfatisa cu impuesto mas abao lo promove mas benta di autonan nobo di distribuidornan autorisa y finalmente hende lo por afford esakinan.
Cero impuesto di importacion pa sector di agricultura
Gremio Comercial y sindical ta di opinion cu e sector di agricultura ta enfrenta riesgonan considerabel di cambio climatico, bestianan cu ta mata cosechanan completo y competencia fuerte di productornan di Merca y Europa (Colombia, Brazil Peru, Chile etc) cu tin acceso na e suministro local di alimento pa bestia, fertilisante, material etc.
Ningun impuesto di importacion ta wordo cobra ariba e suministro aki. Impuestonan recauda pa importacion di alimento pa bestia di minorista of mayorista, no ta condicionnan igual pa e productornan local chikito.
E carni of webonan manda pa Aruba no ta paga impuesto di importacion pa e alimento cumpra localmente y producto final aki ta wordo importa liber di impuesto pa Aruba.
E comite ta recomenda cu e sector di agricultura, considerando e riesgo y costo halto envolvi y e beneficio di spaar importacion y generacion di empleo, e entrada mester ta liber di tarifa y BBO te ora cu e yega e supermercado pa bende na e consumidor of restaurant. Eynan e BBO ta ser paga na final di e cadena di comercialisacion y produccion y e ganashi fiscal ta ser genera, cu un condicion di igualdad pa tur den e structura di costo.
Mas informacion di e rapport “Level Playing Field” y recomendacionnan den nos siguiente edicion.
