Segun Tarek William Saab Venezuela no mester di un oficina di CPI

(ElNacional) – E fiscal general di Venezuela, Tarek William Saab, a sigura dialuna cu na Venezuela no ta necesario e instalacion di un oficina di e Corte Penal Internacional (CPI) pasobra e Ministerio Publico ta den capacidad di realisa investigacionnan ariba presunto violacionnan di derechonan humano.

“Na Venezuela nos ta haci husticia den materia di derechonan humano. No tin mester pa un instancia transnacional, sea e ta yama CPI of con cu ta, haci loke ya caba nos ta haciendo na e pais. No tin motibo pa mete na Venezuela un organismo transnacional,” el a bisa den un entrevista concedi na Globovision.

Djis algun dia pasa, e gobierno di Nicolas Maduro a suscribi un acuerdo cu e fiscal di CPI, Karim Khan, cu ta inclui e instalacion di un oficina di asistencia tecnico na Venezuela.

El a sigura cu e firma di e di dos Memorandum di Comprendemento ta un avance positivo di e Estado Venezolano, locual, den su opinion, “ta un tema cu no mester wordo usa ni na fabor ni den contra. E tema di derechonan humano ta un tema di husticia y di berdad.”

Saab tambe a insisti cu hopi di e denuncianan presenta na CPI ta promovi pa esnan cu no ta victima.

El a señala cu e iniciativa di e secretario general di e Organisacion di Estadonan Americano, Luis Almagro, di hiba Venezuela dilanti e Corte Penal Internacional tabata un conspiracion estrictamente politico.

E fiscal a enfatisa cu e Ministerio Publico ta lidera un accion penal cu, basa riba e denuncianan di derechonan humano, a actua cu hopi forsa di manera estrecho y di un forma implacabel, cu ta e sancionnan den e materia aki y cu tin cifra- y informenan.

El a indica cu Ministerio Publico a documenta por lo menos cuater mil folder dilanti e fiscalia di CPI pa demostra e efectonan di e sancionnan ariba e pais.

“E realidad ta cu tin un alcance di comprendemento. Esaki ta e di dos alcance di dicho memorandum y nos ta bay sigui den loke nos ta yama e etapa di complementaridad y demostra cu Venezuela den e casonan concreto cu na su momento por a wordo denuncia a haci husticia,” el agrega.