(EFE) – Piedranan di plastico forma pa ton di desperdicio benta na lama cu ta smelt debi na calor y ta uni cu e sedimentonan natural ta alterando e costanan di Caribe Colombiano na unda e contaminacion pa e producto deriva di petroleo ta aumentando.
Investigadonan di e fenomeno aki, geologo Nelson Rangel, di Universidad di Atlantico y Felipe Lamus di Universidad del Norte, ta lidernan di ekipo cu a haya e aparicion di e piedranan di plastico, algo imposibel pa ciencia y pa e geologonan.
Den e zona di Galerazamba, 75 kilometer for di Barranquilla, na unda e investigacion ta tumando luga, e ekipo dirigi pa Rangel y Lamus a haya dos tipo di piedra di plastico y dos tipo di suelo, tur di nan producto di e contaminacion.
“Contaminacion plastico na Caribe Colombiano tin origen principalmente den awanan di pos, actividadnan na lama y riunan,” Rangel a splica.
Ademas, e doctor den geologia a bisa cu “e halto contaminacion di plastico cu ta evidencia den e formacion di piedranan nobo ta e mas chikito di e problemanan, esun di mas grave ta ora e plastico ta consumi pa piscanan, cabaron y tur tipo di bestia, ta drenta den nan organismo y despues humano ta consumi esey.”
Den sentido ey, Rangel a agrega cu riu Magdalena e cual ta atravesa e pais di sur pa nort, “ta un contribuyente hopi importante di plastico di lama Caribe, liberando 200 ton pa aña debi na concentracion di municipionan y poblacion di e zona.”
Loke Rangel a plantia ta mustra un vision preocupante den futuro di lama pa corto plaso, ya cu segun datonan di Foro Economico Mundial cita pa Unesco recientemente, si no ta tuma medidanan, na 2050 den lama lo tin mas plastico cu piscanan.
