E fin di siman trai lomba, Aruba a despedi di otro 2 baluarte cu a wordo yama pa bay nos dilanti. Un ta e gentil cabayero-ruman di tur e masonnan , Sr. Lodewijk . F. “Louis” van Delden, di Lodge El sol naciente y miembro activo te na ultimo segun su salud a duna, di varios otro capitulonan, manera Rose Croix y mas organisacionnan masonico. Un shon di hende cu hopi conosemento y hopi sabiduria riba tereno di bida, spiritualidad y caridad.
Un bon persona cu a yuda ken cu a bati na su porta cu conseho y mas. Brother Louis a yega e bunita edad di 87 anja. E ta e tata di entre otro mi bon amiga Milly van Delden, cu nos a conose hopi anja pasa , ora Milly tambe a join y bira un lider scout di e grupo Kimball O”Hara. Dominee Jan Rinzema di Kerki Oranjestad, cu su bunita curason a guia un bunita sirbishi di gradicimento pa e bida rico na sabiduria y conosemento di Louis van Delden. Lady Ruth a canta dos cantica gospel hopi bunita, ariba peticion di e yuinan Milly y Myrna. Ela wordo acompanja riba e orgel grandi , unico den su sorto riba Aruba, toca pa Sr. Jan Willeboordse den un forma magnifico, organista profeshonal cu curason. Nos a hasi esaki di curason . Despues Ruthy a recita un bunita poema acrostico na ingles, cu Louis su nomber. Y manera no ta un secreto mas, rumannan mason di Louis a tene “wacht” of guardia banda di e kaha, den cual un bon tata, welo, bisawelo, amigo y ruman tawata reposa.
E otro baluarte cu nos ta bisa ayo y te despues, ta e bunita, simpatico, carinoso y talentoso artista cantante di e agrupacion Chicas Gaiteras, Carolyn Kelly, kende a fayece te na Spanje, Europa.
Nos por a lesa di esey den nos corantnan local. Den un tempo record a traha duro y tene un concierto di kita sombre, un concierto cu a papia di e bida yen di alegria y canto sublime di Carolyn Kelly, un hende cu ta bisa locual e ta sinti y sinti locual e ta bisa, my kind of people !. Royal Funeral Home tawata yen yen paden y pafor , di famia, amigonan, conosirnan y fanaticonan di Carolyn y Chicas Gaiteras. Nos no por a bay mas tempran pa scucha e otro artistanan duna nan presentacion , pero ta pensa cu sigur esey tambe a bay bunita. Chicas Gaiteras a para toca y canta pafor bau di un tent, mientras centenares di hende cu a bin despedi y scucha e concierto, tawata para bao shelo na strea. Por a sinti e emocionnan mixto den e bunita energia cu a rondona.
E motor Marion Werleman cu ta bon conosi pa letranan fabuloso impactante di e cancionnan cu Chicas Gaiteras ta canta, a repasa e canticanan cu e strea y curason di e grupo aki, Carolyn Kelly a canta. Nan a clausura e concierto cu e cancion di mas mas bunita canta pa Carolyn, cu ta e cantica WELA. Nan hit di oro mas grandi pa e temporada di Pascu. Ki emocional y bunita pa a wak un di e integrantenan di Chicas, cana bin busca e bunita y dushi wela di Carolyn pa e a para cu nan bau e tent, mientras tawata cantando WELA. Y despues a busca Carolyn su Mama tambe. Y cu forsa di ariba, tur dos a canta y move un crenchi ariba e dushi ritmo di WELA.
Hopi colega den prensa y publico a filma e dushi y inolvidabel concierto aki como homenahe na Carolyn y ta hopi a saca potret cu nan celular pa tin recuerdonan bunita di e musica y canto di e dushi hende muhe aki cu a impacta cu su presencia y participacion artistico den Chicas Gaiteras pa hopi anjas.
Tur hende hisa man ! Tur hende hisa man ! Cu man na laira ! Bati bati man, bati man pa Carolyn , bati bati man, bati man pa Carolyn ! Asina e concierto a culmina cu pueblo di Aruba, hendenan den bistirnan floria, tur na color alegre, manera e alegria di Caro tawata. Tristeza a cana man den man cu alegria, pasobra, cu dolor na curason, ta bisa ayo y te despues na Caro Caro Carolyn.
Danki Gilmar Croes, cu tawata man drechi di Marion Werleman den pone e concierto aki riba pia. Y tur cu a coopera den un of otro forma, pa despedida di un yiu di tera, un di e yui muhenan talentoso di Vicente Kelly dfm, cu tampoco Aruba por lubida. Manera e cantica bunita Wela ta bisa :”Bendishon wela”, nos ta bisa :” Bendishon Carolyn “ Luz eterno y amor infinito rondonabo den e Reino Celestial. Danki pa a stima bo isla y bo cultura asina hopi !!!
Shonnan, danki pa lesa nos relato, “Stay safe, love you too “! Un bearhug pa tur cu tin mester di dje. Nos ta sigui duna Dios danki pa tur tur cos. E tin tur cos den su man. E ta Alfa y Omega.
Un biaha mas, nos condolencia, consuelo y amor na tur famia, amigo y fanaticonan di e dos baluartenan aki.
