E siman aki riba rednan social a circula e noticia cu ex-prome minister di Aruba, Nel Oduber ta bay drenta hunta di comisario di WEB. Esaki mesora a ricibi critica di parlamentario independiente, Ryçond Santos do Nascemento, kende a critica e nombramento como otro caso di “friends and family.”
“Un cos ta cu e partidonan tradicional AVP y MEP ta pega cu e mesun malesa di “friends and family” y
otro cos ta cu Nel Oduber mes tambe no tin cuero di cara ora di acepta pa nombr’e como miembro den
hunta di comisario di WEB Aruba N.V.,” Santos do Nascemento a skirbi den un articulo dia 6 di juni ultimo. “Aparentemente e pago di por lo menos dos mil florin pa luna ta mucho atractivo p’e nenga. Aki nos ta ripara cu e politica bieu di fix famia ta biba keto bay den MEP.”
Santos do Nascemento a critica con Oduber por haya e funcion di comisario ora tene cuenta cu principio di bon gobernacion. “Principio di bon gobernacion ta exigi cu un candidato pa bira comisario mester ta
conoci pa ta imparcial, confiabel y mester tin suficiente conocemento, habilidad y experiencia. Nel
Oduber ta MEP y simplemente no por ta imparcial pa cu maneho cu MEP kier hiba riba area di energia.”
Di su banda, Oduber a contesta na e critica riba su pagina di Facebook. “Na un manera baho y vil kier bin cuestiona cu mi a bay yuda entrante 1 juni den hunto di comisario nan di WEB, compania cu ami a funda y percura den varios gobierno pa e por a funciona na un manera responsabel sin corupcion y faboritismo alguno!” Segun Oduber, a acerk’e “mas cu dos aña pasa” pa “bin yuda, pero a dicidi di pens’e bon.”
Ademas Oduber a adresa e critica cu e lo ta cobra “yen di pensioen di ambtenaar, diputado, staten lid, ministro di Antias, etc.” bisanod cu e “nunca a cobra ningun cen di pensioen como ambtenaar” y cu tampoco a cobra “ningun cen di pensioen… como diputado casi 12 aña y miembro di Eilandsraad.”
