Den un di e tantisimo caso cu Richard Kramers a entama contra land Aruba pa forsa gobierno haci su persona hoofd interino di e departamento di Guarda Nos Costa (GNC) back, el a perde. Loke a keda den disputa ta si VDA ta bay dun’e su “Verklaring van geen Bezwaar” (VGB) y tambe tin un otro rapport cu a bin nobo cu ta den man di VDA.

Gobierno di Aruba a propone caba un biaha pa Kramers bay KPA back, pero segun Kramers e lo perde schaal 14 di su salario y lo baha te politieschaal 08,y segun Kramers, (“onder meer heeft hij als belang aangevoerd dat zijn terugplaatsing bij het KPA een aanzienlijke demotie”) esaki lo nifica un degradacion den su posicion.

Alabes, Gobierno di Aruba a habri oficialmente un vacatura pa cuminsa busca un hoofd di e departamento di Guarda Nos Costa.

Na e momentonan aki Guarda Nos Costa tin su director interino cu ta cay bao di Suzy Nadal.

Cu esaki tambe e capitulo di Richard Kramers den Guarda Nos Costa ta keda cera.

Tabata 12 di september di aña pasa cu Bon Dia Aruba a publica cu “Rapport devastador di VDA ta pone cu Richard Kramers ta out.” Den esaki, a informa cu e director di GNC na e momento ey, su prueba di VDA (Veiligheidsdienst Aruba) a indica cu e no por sigui fungi como director di e departamento aki, segun investigacion di e Veiligheidonderzoek di VDA.

Un Veiligheidonderzoek di Siguridad Nacional di Aruba ta tuma na cuenta inteligencia hudicial, proces verbaal di polis, participacion of apoyo den actividadnan peligroso di Estado, apoyo na organisacionnan peligroso pa Estado, comportacion y circunstancianan personal den un periodo di e ultimo 10 aña di bida di e persona en cuestion.

E proposito di e investigacion aki ta pa determina si e persona por cumpli fielmente cu su obligacionnan den e funcion den tur circunstancianan, ademas tambe ta wordo haci pruebanan medico y psicologico.

Di e forma aki ta evita cu por cuminsa cu un investigacion di siguridad mientras cu te ainda no tin garantia cu e persona en cuestion ta cumpli cu tur e rekisitonan di su funcion.

Den esaki, Kramers a apela e rapport aki, el a gan’e, pero te ainda loke ta den disputa ta si VDA ta bay dun’e su “Verklaring van geen Bezwaar” (VGB) y ademas tambe tin un otro rapport cu a bin nobo cu ta den man di VDA.

Manera a menciona caba, Kramers a entama varios caso contra land Aruba pa minister di Husticia Rocco Tjon lag’e den su funcion como director interino di GNC, debi cu un director interino no mester VGB.

En todo caso, el a perde su casonan pa forsa gobierno pone back den su funcion como director interino di e departamento aki y oficialmente Departamento di Recurso Humano (DRH) oficialmente a habri un vacatura pa e funcion di director di GNC.