(EFE) – Gobierno di Colombia y guerrilla Ehercito di Liberacion Nacional (ELN) ayera diabierna a firma un alto al fuego “nacional, bilateral y temporal,” cu despues di un tempo di ahustacion, na comienso ta bay dura 180 dia for di 3 di augustus proximo.
Esaki ta e resultado principal di e tercer ciclo di dialogo di paz, cu a tuma luga for di 2 di mei na La Habana y cu e partidonan a presenta despues di firma di e Acuerdonan di Cuba, cu presencia di presidente di Colombia, Gustavo Petro, y e prome comandante di ELN, Eliecer Herlinto Chamorro alias “Antonio Garcia.”
Un alto al fuego, segun e partinan a splica, ta contempla un prome fase di alistamento te dia 6 di juli, den cual ta bay duna e orden di detene e ofensiva y ta bay keda oficialisa dia 3 di augustus.
Ta trata di e alto al fuego mas largo cu a yega di acorda te e fecha pa Gobierno di Colombia y ELN.
Hefe negociado di ELN, Israel Ramirez alias “Pablo Beltran”, a sostene cu “esaki ta busca un proposito humanitario, disminui e conflicto pa cu na Colombia lo tin un miho clima pa e participacion di e sociedad.”
E hefe di delegacion gubernamental, Otty Patiño, di su parti a bisa cu e paso “crucial” aki ta pa e proceso di paz lo avansa.
Ademas, e partinan a acorda cu ONU y Iglesia Catolico ta bay supervisa e cumplimento di alto al fuego acorda ayera y cada dos luna lo tin un reunion di siguimento.
Prome comandante di ELN a sigura cu te awor no a firma “acuerdonan substancial”, sino pacto di procedemento, aunke esakinan ta bay sirbi pa “avansa.”
