(France24) – Bao mandato di ex-presidente di ultraderecha Jair Bolsonaro, Brazil a uni na un acuerdo na 2021 cu mas di 140 pais pa pone fin na deforestacion na nivel mundial pa aña 2030. E presidente di iskierda Luiz Inacio Lula da Silva, ken a asumi e funcion dia 1 di januari ultimo, a converti esaki den un pieza central di su politica medio ambiental.
“Mi ta compromete mi mes pa tuma e liderazgo mundial di Brazil back den e disminucion di cambio climatico y control di deforestacion,” Lula a bisa den un discurso na un evento di lansamento di un proyecto.
E Plan di Accion pa Prevencion y Control di Deforestacion na Amazonia (PPCDAM) ta establece un politica coordina entre mas di un decena di ministerio te fin di mandato di Lula na 2027.
Ta pidi un mayor uso di inteligencia y imagennan satelital pa registra e actividad criminal, regularisacion di titulonan di propiedad y uso di un registro rural pa monitoria e maneho corecto di e boskenan considera como vital pa stop cambio climatico global.
Ta bay recupera e areanan afecta y ta bay aumenta e vegetacion nativo a traves di incentivo economico pa e conservacion y maneho forestal sostenibel, segun e plan ta indica.
Entre e accionnan cu ta bay tuma, autoridadnan ta bay crusa informacion di e sistema financiero cu e registro rural y otro basenan di dato y imagennan satelital pa elimina e personanan cu ta comete actonan ilegal cu ganaderia y palo.
Inteligencia financiero, por ehemplo, por señala movemento di fondonan pa paga ekiponan usa pa sacamento ilegal di oro. E plan tambe tin den dje e creacion di un sistema di rastreo pa palo, ganado y otro productonan agricola di Amazonia, na un momento cu e paisnan importado ta exigi cada biaha mas prueba cu e productonan no ta bin for di e terenonan deforesta.
