Den un reunion diaranson 31 di mei, minister Geoffrey Wever a ricibi un presentacion for di Dutch Caribbean Performance Rights Organization (DUCAPRO) riba e posibilidadnan pa fomenta un Creative Music Industry mas vibrante na Aruba. Dirigi pa Sr. mr. David Kock, DUCAPRO ta un organisacion cu su meta ta pa fomenta un industria creativo mas lucrativo pa e artistanan, door di proteha nan propiedad intellectual mas activamente.
Parti di e maneho economico ta pa promeve e promising sectors, pa cual e creative industry ta forma parti di dje. E industria creativo ta importante pa proteha y promove esnan cu activamente ta creativo den e industria aki.
Na Aruba ta un di e tiki luganan na mundo caminda no conoce e norma di paga artistanan (kendenan ta creador di arte y/of musica) pa e derecho di uza nan creacion. DUCAPRO a mustra riba posibilidadnan economico si por “monitize” e artenan creativo pa asina sostene e porvenir di e artistanan.
Minister Geoffrey Wever a gradici sr. David Kock y su yiu homber pa tuma e tempo pa duna Ministerio di Asuntonan Economico e presentacion aki.
