Transporte di productonan di Colombia pa Aruba tin su retonan pa nos comerciantenan. Mirando e importancia pa trece solucion pa esaki, durante e Business Rountable: Cost of Transportation & Logistics, un grupo di empresario di Aruba hunto cu empresanan Colombiano di transporte y logistica a hiba discussionnan riba e retonan di transporte maritimo y aereo di productonan pa Aruba.
Jan-Willem van Bokhoven, director di Holland House a duna un introduccion riba e interes pa y importancia di fomenta mas comercio entre Aruba y Colombia. E meta di e combersacionnan tabata terce solucionan pa e retonan logistico, pa asina haci transporte di producto pa Aruba mas facil, mas barata, y mas frecuente. Esaki lo trece un beneficio grandi pa nos consumidornan.
Aruba kier accelera y engradece comercio cu Colombia. Apesar di tin solamente 110 mil habitante, Aruba ta ricibi un cantidad grandi di turista stay-over y di crucero pa aña, cu un demanda grandi pa producto y servicionan. Nos economia ta draai grandemente riba Dollar, cual cu un prijs di intercambio halto compara cu e Peso Colombiano, por ta beneficioso tambe pa companianan Colombiano inverti den Aruba.
Informacion valioso y interesante riba e proceso di transporte a keda presenta. Definitivamente tin demanda grandi pa productonan di Colombia for di Aruba, pero lo rekeri cooperacion entre importadornan di Aruba hunto cu Gobierno di Aruba pa por logra palabracionnan mas beneficioso pa ambos importador y exportador.
Minister Geoffrey Wever a concorda hunto cu Camara di Comercio pa nan lidera e combersacionnan entre empresanan local, pa mira ki “draagvlak” tin pa coopera hunto riba importacion. E tamaño di nos mercado ta trese retonan manera volumen y consistencia pero e boluntad tey pa trece solucionan factibel.
Minister Wever ta kere firmemente cu si logra crea cierto palabracionnan entre importadornan local, y cu esfuerso di Gobierno di Aruba pa mehora algun retonan logistico, lo por berdaderamente haci un diferencia positivo riba e prijs di productonan, y asina tambe e costo di bida pa nos ciudadanonan.
