Diabierna siman pasa a tuma luga e apertura oficial di Weganan Escolar (WE) Aruba 2023. Un apertura hopi bunita yena cu alegria y goso na unda publico presenta por a disfruta di e desfile oficial di e alumnonan di tur e scolnan cu ta participa y despues di un presentacion di baile. Despues di apertura actividadnan di WE Aruba 2023 a cuminsa di biaha y Kamilah Dammer di IBISA ta conta un poco di con tur e actividadnan ta bayendo y kico pueblo por spera di e clausura di WE Aruba 2023.

Dammers a splica cu diabierna nochi mes e actividadnan a cuminsa cu e prome wega di futbol. Diasabra a cuminsa cu weganan di badminton y competencia di functional fitness, dialuna a bay over pa basketball, diamars tabatin futbol pa mucha homber vijfde y zesde klas, diaranson y diahuebs a toca turno na kleuter y diasabra tin beach tennis.

“Asina e actividadnan ta keda cambia, un tiki di cada deporte y nos ta preparando tambe pa e clausura dia 9 di juni den Joe Laveist Ballpark. 13 actividad deportivo, mas e apertura y clausura y e baile cu ta bay bira basta grandi dia 10 di juni den Entertainment Center,” Dammers a indica.

El a sigui splica cu e clausura ta bay ta mesun estilo cu e apertura cu un show grandi, pero solamente e parti e desfile no ta bay tuma luga. El a remarca cu pa e clausura nan ta bay purba yena Joe Laveist y esey nan ta bay haci cu e weganan final di futbol di kleuter.

E dia di clausura ta bay cuminsa atardi cu e weganan di kleuter, mucha muhe di tres y cuater luga, mucha homber di tres y cuater luga y despues ta hunga e finalnan pa asina toch por tin un publico grandi. “Kleuter ta un di e actividadnan cu mas ta yena stadion y esey nos ta bay hiba pariba na Joe Laveist.,” el remarca.

Ayera a tuma luga e weganan di futbol di kleuter mucha homber. Dammers a indica cu un total di ocho kleuterschool a hunga, e ocho miho cu a clasifica y otro diahuebs tambe tin weganan di futbol di kleuter mucha muhe, cu tambe ta bira e miho ocho kleuterschool cu a clasifica. “Mayoria deporte ta e miho cuater of miho ocho sol cu ta participa,” el a agrega.

Pa loke ta e acogida di publico, el a indica cu e acogida ta hopi bon y na e diferente actividadnan tin publico grandi ta bay apoya e muchanan cu ta competi.

Dammers a sigui splica cu e aña aki nan a regala peluche di e mascota WiWi na e muchanan cu keda na prome luga. E ekiponan cu keda na prome luga ta haya medaya, peluche, nan tas cu boter di awa y pen di WE Aruba 2023. Esaki, el a enfatisa, ta un adelanto di aña pasa. “Mi ta kere tiki tiki nos ta mehora, esaki ta di dos edicion y mas cu claro otro aña ta bay ta mas grandi y miho,” el a resalta.

El a subraya cu premiacion di cada actividad ta pasa riba e mesun dia, pero e dia di clausura ta bay tin premiacion di scol di aña y docente di aña den kleuter, basis y voortgezet. Ademas e aña aki ta bay purba saca un docente femenino y un docente masculino. Tambe ta bay entrega premio di MPV (Most Valuable Player) pa cada deporte.