For di dialuna 29 di mei te awe 2 di juni, ta bin tumando luga na Aruba e Dutch Caribbean Agro Visioning Process Conference, na unda gobernantenan di Corsou, Boneiro, Saba, St. Eustasius, St. Maarten y Aruba a reuni cu e obhetivo di fortifica lasonan y crea un plan concreto di cooperacion den sector primario.
Ayera 1 di juni, redactor di Bon Dia Aruba a acerca e conferencia pa asina haya informacion con otro islanan manera Corsou y Boneiro ta implementa proyectonan den sector aki y kico ta nan aporte den e conferencia aki.
Gerritson Doran di Head Agriculture Affairs di Corsou a splica na Bon Dia Aruba cu esaki ta un conferencia cu a tuma luga dos biaha entre e seis isla di Caribe Hulandes, caminda nan ta bay traha metodonan pa realisa conhuntamente riba tereno di agricultura. Ayera nan tabata traha riba proyectonan cu a realisa pa termino cortico.
Na Corsou nan ta bezig cu tecnologia moderno debi cu nan problema ta awa y cu tera, na unda cu e tecnologia nan ta purba di reduci e cantidad di tera cu awa mas lihe pa planta di un manera mas profesional cu menos uso di naturalesa.
E meta di e congreso aki ta pa nan yega na seguridad di alimentacion pa e seis isla. “Nos ta trahando riba e parti cu nos por garantisa cierto cuminda pa e pueblo di Corsou, mirando loke ta pasando mundialmente di guera di Rusia cu Ucrania y loke nos a pasa den pandemia, e comestibelnan dia pa dia ta birando menos y nos ta dependiendo hopi di importacion. Pero aworaki nos mes por purba di haci y asina ta garantisa e cuminda pa e pueblo,” Doran a sigura.
Pa loke ta trata proyectonan, Moran a menciona cu Gobierno di Corsou ta purba di facilita cu e proyectonan aki ta bira realisabel y e pueblo ta bay mira e beneficio den termino largo.
Piscamento ta cay den esaki na unda Doran a señala cu ta cay den e parti di agricultura, pesca y un tambe un parti cu nan a haya hopi interesante ta pa hiba e bida di agricultura na muchanan di scol, “nos a mira un proyecto akinan na Aruba na Prinses Amalia School y ta un proyecto hopi interesante y nos kier copia tur e proyecto ey pa nos por cuminsa for di chikito stimula e muchanan cu e bida di agricultura, pasobra dia pa dia e ta birando menos den hobennan,” Doran a finalisa.
Di su parti, Maurice Adriaens ken ta fungi como Interim Manager di Landbaow Veeteelt en Visserij (LVV) di Boneiro a bisa cu nan ta haya importante e conferencia aki debi cu asina ey nan ta siña conoce otro departamentonan envolvi den sector primario di tur e seis isla den Reino Hulandes, na unda cada isla tin nan experiencia riba diferente area y conhuntamente hunto nan ta haci mas fuerte cu cada un riba su so, pa e motibo aki nan ta wak ki otro islanan ta haciendo den area aki y splica nan tambe kico Boneiro ta haciendo pa nan haya sa.
Por ehemplo, Adriaens a trece dilanti cu Aruba tin proyectonan interesante na scolnan na unda nan ta stimula mucha pa cuminsa planta “y esey ta hopi interesante mi ta kere pa tur isla, tambe nan tin un programa di informa comunidad over importancia di producto local y esey tambe ta un cos cu nos por siña for di dje, otro islanan como por ehemplo Corsou, nan tin e cuido di bestia na unda nan tin experticio den esey y den esaki Aruba a menciona cu ta falta un bon dokter di bestia y nan por hay’e for di Corsou of Boneiro, compartiendo conocemento y personal, e cooperacion entre e islanan ta hopi importante pa nos kita e ehemplo di wak Hulanda of Merca pa solucionnan, mientras cu kisas nos mes tin e con y e solucion.”
Boneiro a cuminsa set up agricultura di nobo manera Adriaens a menciona, nan tabata hopi conoci den pasado pa su produccion di berduranan y e bestianan cabrito caminda nan a cuminsa exporta pa otro islanan, pero el a sigura cu esey a bay un tiki perdi pa motibo cu “tur hende kier sinta na oficina den airco y no kier traha riba tereno mas,” el a bisa.
Patia y otro tipo di simianan nan tabata zorg pa otro islanan haya, nan tabata bende den cantidad grandi pero esey a bay perdi y nan kier stimula e sector agrario back pa e islanan “ bo tin cu haci loke bo tabata fuerte den dje y nos cria di bestia y cabrito nos ta enfocando riba nan pasobra te ainda nos tin e bon nomber di e carni di nos cabritonan cu tur hende a gust’e y tambe nos ta bay trece back e parti di plantamento haciendo uso di conocemento di Corsou y despues nos por comparti esey cu otro islanan.”
Rendy Maduro vocero di Departamento di Agricultura, Cria y Pesca di Santa Rosa Aruba a trece dilanti cu for di dialuna cu e conferencia aki Santa Rosa tabatin diferente bishita rond di Aruba cu e personanan invita di e seis isla pa e continuacion di e conferencia cu a cuminsa aña pasa na Corsou y mas tanto ta trata riba e proyectonan mas conveniente pa Aruba y kico ta mas miho pa cada pais, den sesionnan cu nan ta bin haciendo den dianan aki.
E conferencia aki ta culmina awe cu e firmamento di un MoU caminda tur lo cual a palabra y di ideanan cu a bin dilanti cu ta conveni e islanan ta bay firma un acuerdo pa asina cuminsa traha riba proyectonan mas specifico y mas defini.
Aunke e evento ta limita pa dignatarionan y representantenan, ta bay presenta e resultadonan di e conferencia y tambe ta bay discuti esey cu cunukeronan y stakehoders local. Den e manera aki por haya e punto di bista di agricultornan, sigurando cu esfuersonan colectivo ta alinea cu e necesidadnan di e sector primario y tumando decisionnan inclusivo. Cu hunto por tin crecemento pa medio di colaboracion.
