Diamars atardi, Minister di Enseñansa y Deporte, Endy Croes, a reuni cu e ekipo di Setar NV, directiva di S.E.P.B., cabesante di S.P.O. Brazil y directiva di S.P.O. Santa Cruz pa trata e tema di instalacion di camara di seguridad na cuater scol na Aruba.
Durante e reunion aki representante di Setar NV, Sr. Evan Giel, hunto cu e representantenan di Motorola Solution, Sr. Noberto Torres y Sr. Jose Pagan, a duna un presentacion amplio di un proyecto di camara di seguridad.
E intencion di esaki ta pa pone camara di seguridad na e scolnan E.P.B. Oranjestad, E.P.B. San Nicolas, S.P.O. Santa Cruz y S.P.O. Brazil pa asina mitiga e problema di seguridad cu tin actualmente na e scolnan aki.
Ta planifica pa pone camara ultramoderno, unda cu por mira e detayenan di mas chikito. Setar NV a bay tur cuater scol caba pa duna un presentacion y pa evalua e area na unda lo instala e camaranan aki. Actualmente ta den en espera di e propuesta final di Setar NV.
Lo tin vigilancia 24/7 na Command Center na Savaneta, pa asina resolve e problema social cu tin na e scolnan aki. Pa finalisa, Minister Endy Croes ta indica cu e proyecto ta den proceso y den menos di dos luna lo instala camara di seguridad na e scolnan aki.
