(NTN24) – Brasilia, capital di Brazil, diamars ultimo 30 di mei a tene un cumbre di lidernan sur Americano, organisa pa presidente Luiz Inacio Lula da Silva. E evento a conta cu e participacion di distinto hefe di Estado di e region y tabata busca fomenta integracion regional.
Ademas, e evento a conta cu e presencia di Nicolas Maduro, lider di e regimen di Venezuela, ken a yega na e pais despues di ocho aña di ausencia. No obstante cu esey, e yegada di Maduro a genera mal contento den varios legislado Brasileño, ken a rechasa e presencia di e politico den nan nacion.
Cu borchinan cu e potret di e lider Venezolano gritando frasenan como “asesino,” e legisladonan a drenta den un sesion di Congreso pa critica e forma con e presidente Lula da Silva a ricibi Maduro prome cu e reunion di mandatarionan sur Americano.
E cumbre na unda un total di 11 hefe di Estado a participa, a ricibi criticanan di diferente sector di Brazil, cu tambe a critica e presencia di Maduro pa e sosten cu e ta supone cu e tin como mandatario considera ilegitimo y cu tin un investigacion habri na Corte Penal Internacional.
E presidente Uruguayo, Luis Lacalle Pou, a critica cu su homologo a defende Nicolas Maduro ora a sigura cu e denuncianan di autoritarismo na Venezuela ta debi na “historianan.”
“M’a keda sorprendi ora a papia di loke ta sucede na Venezuela ta historianan,” Lacalle Pou a bisa durante su discurso na Lula y otro mandatarionan.
Den mesun linea, presidente di Chile, Gabriel Boric, a afirma cu e situacion Venezolano “no ta trata di historianan” sino di “un realidad serio.” “Derechonan humano mester keda respeta semper,” el a bisa.
Esaki ta prome biaha den casi un decada cu dirigentenan di e nacionnan di sur America a reuni pa discuti proyectonan di cooperacion y purba di repara e integracion regional, despues cu Unasur a fracasa memey di distancia politico na varios pais di e region.
