(EFE) – Fiscalia Colombiano a haci un inspeccion ayera diamars den un dependencia di e Casa di Nariño, sede di Ehecutivo, como parti di investigacion di un supuesto hortamento di placa na cas di Laura Sarabia, hefe di gabinete di Gustavo Petro y e presunto abuso di poder, mediante uso di poligraaf, den un interogatorio.
“E diligencia cu ta bay realisa awe 30 di mei tin e obhetivo di recauda informacion y realisa un labor di verificacion pa establece existencia di camaranan di siguridad pa drenta na edificio Galan, na unda supuestamente ta ubica e sala di poligraaf,” Fiscalia a bisa den un comunicado.
E investigacion ta relaciona cu denuncianan di Marelbys Meza, ken a traha como babysitter na cas di Sarabia y a bisa cu nan a interog’e na dependencia di palacio presidencial como sospechoso di e supuesto hortamento di un tas cu un suma di placa no conoci.
Segun Meza a revela, un bes Sarabia a ripara di e hortamento, miembronan di siguridad presidencial a hib’e na un edificio ubica dilanti di Casa de Nariño pa interog’e y tambe a keda someti na pruebanan di poligraaf sin un orden hudicial, loke a ocasiona un polemica na e pais.
Diadomingo ultimo, Casa de Nariño a informa “cu e supuesto hortamento a tuma luga na januari di 2023 y dia 29 di e mesun luna a haci e denuncia penal na autoridadnan competente.”
“Nos ta rechasa e version tocante supuesto abuso di poder, mal uso di recursonan publico y maltrato na personanan indefenso,” Gobierno a señala den un comunicado, den cual a agrega cu “e proceduranan” den cual e ex-babysitter a keda someti “a efectua den dependencia identifica di Jefatura pa Proteccion Presidencial, visibel, debidamente identifica y dispuesto den e mesun ubicacion for di basta aña caba.”
Sinembargo, fiscal general di Colombia Francisco Barbosa, cu ta enfrenta cu Petro, a destaca cu “e unico entidad cu por adelanta procesonan investigativo tocante delitonan ta Fiscalia General di Nacion.”
E comunicado di Fiscalia di ayera ta bisa cu Petro “falta di bisa e berdad” di loke a realisa ta un inval y a sigura cu “e diligencia hudicial cu ta bay adelanta ta un inspeccion solicita pa un fiscal di Direccion Specialisa contra Violacion na Derechonan Humano.”
Ademas, a inspecciona Jefatura di Proteccion di Presidencia pa asina haya sa e lista di personanan cu entre januari cu februari di e aña aki a haci parti di skema di siguridad y transporte asigna na Sarabia, considera como e man drechi di Petro.
E documento a conclui cu e inspeccion ta un competencia di fiscalnan pa “e desaroyo normal di investigacion, na tempo cu ta garantisa e derechonan fundamental di esnan cu por keda afecta cu e diligencia.”
