E recorte di 60 miyon pa loke ta e gasto den sector di cuido medico ta keda vigente y Hulanda, segun Secretario di Estado Alexandra van Huffelen ta indica den su contesta ariba pregunta realisa pa e portal di noticia local NoticiaCla, ta spera cu Aruba cumpli cu esaki.
E Secretario di Estado a indica cu nan ta haya importante pa Aruba realisa e recorte. Den caso cu Aruba no logra cumpli cu e medida aki, Aruba y Hulanda mester bay den dialogo pa determina kico lo bira e siguiente siguiente pasonan cu mester tuma.
Pa loke ta trata e ley di Raft (Ley di Reino di Supervision Financiero), van Huffelen a indica na e Noticia Cla cu Gobierno di Aruba mester informa nan ainda di kico ta nan posicion pa cu esaki.
Secretario di Estado a splica cu a palabra cu ta bay traha riba un Ley di Reino di Supervision Financiero, pero e reacion di Gobierno di Aruba ainda no a ser manda pa Hulanda. “Gobierno di Aruba mester informa nos riba esey ainda” Van Huffelen a bisa NoticiaCla diabierna mainta den un entrevista.
El a sigui splica cu e ley di Raft ta condiciona na e refinanciamento di e debe di COVID-19 cu Aruba mester paga Hulanda bek e aña. “Nos a informa nan tambe cu no solamente nos ta haya cu e ley mester bin, pero cu e ley ta condiciona na palabracion riba refinanciamento di e sosten di likides” Van Huffelen a bisa.
Aruba, compara cu e otro islanan den reino cu ya caba tin e ley di Raft desde 2010, ta tratando di evita cu ta bin cu e Ley di Reino di Supervision Financiero, y ta mustra riba e ‘onderlinge regeling’ como un alternativa, mirando cu na april di e aña aki, nan a logra bari COHO for di mesa y a firma un ‘onderlinge regeling’ na su luga.
