Tin investigacion forensico na DIP riba casnan na Sero Colorado

Dialuna mainta durante conferencia di prensa di Gobierno di Aruba, prome minister Evelyn Wever-Croes a duna un splicacion riba e investigacionnan den Directie Infrastructuur en Planning (DIP), enfatisando cu e unico investigacion forensico cu tin actualmente den DIP ta di Sero Colorado y no tin niun investigacion penal andando.

Di e topico aki, el a señala cu ex-minister Marisol Lopez-Tromp a cuminsa cu e investigacion di Sero Colorado prome cu Gabinete Wever-Croes a drenta den gobernacion. E motibo pa e investigacion ta cu a tuma nota cu hopi hende cu ta bibando den e casnan ta drechando e casnan sin tin un titulo pa ta bibando den e cas, y p’esey ta importante pa haci e investigacion, pa wak ken ta esnan cu ta bibando den e casnan aki y ken ta e doño di nan. Unabes cu e investigacion ta cla, ta bay den dialogo riba esaki cu tur esnan cu ta bibando ilegalmente den e casnan, pa asina busca solucion pa drecha e situacion.

“Tin varios peticion di hendenan cu ta interesa den un cas na Sero Colorado, pero lo mester warda e investigacion forensico aki keda cla. Unabes e investigacion aki ta cla, por bisa cu tur investigacion den DIP, ta tras di lomba y por sigui traha pa futuro, enfocando riba cosnan positivo”, prome minister a duna di conoce.

Tambe e mandatario a elabora riba e topico di peticion y otorgamento di tereno y segun e mes a splica, desde cu a sali e noticia cu e director di Directie Infrastructuur en Planning (DIP) ta ausente temporalmente, nan ta ricibiendo un avalancha di yamada y bishita di ciudadanonan pidiendo ayudo cu otorgamento of peticion di tereno.

Prome minister a indica di ta consciente di e situacion aki, na unda cu peticionnan no ta atendi debidamente y esaki ta un situacion frustrante, pero lamentablemente “Gobierno no por haci nada al respecto.”

Manera ta conoci, na aña 2020 como minister di Infrastructura a traspasa e autoridad pa loke ta otorgamento di tereno na un team di 4 persona cu ta inclui e director y e director suplente. Desde e aña ey, nan ta encarga pa tuma decisionnan riba tur peticion di tereno y actualmente e enfasis ta pa elimina tur e atrasonan cu tin na DIP, pa asina tur persona cu a haci un peticion pa tereno, por haya un contesta lo mas lihe posibel.

“Nos como gobierno no por tuma decision ken si y ken no ta haya tereno, ni ken ta prome cu otro. Esaki ta contra regla. Loke si nos tin como exigencia ta pa elimina e atraso cu tin actualmente. E meta ta pa a traves di DIP nos motiva y stimula e desaroyo cu ta necesario aki na Aruba” prome minister a expresa.

Tambe el a trece dilanti cu e problema den DIP ta un problema cu tin añanan andando. E investigacionnan penal cu tabatin den tur e añanan aki, como por ehemplo e caso Avestruz den cual a sali den su veredicto e preferencia cu tabata aplica den tempo ey, na aña 2009 ora el a cuminsa, “esey a perhudica full e departamento. Aworaki mi tin e tarea pa mi reorganis’e, percura pa e servicio na e ciudadano lo mehora y esey no ta un cos cu ta pasa den un, dos of tres, pasobra e raiz di e problemanan ta hopi infiltra den e departamento, cosnan grandi cu ta pasa pero e ta nos prioridad aworaki. E ta lamentabel pasobra tin hende eynan cu ta traha cu alma y cuerpo y nan tambe ta generalisa den e bista di mal servicio cu e departamento ta duna,” el a bisa.

Aworaki tin atencion riba aspecto di organisacion como por ehemplo, ora un persona ta haci un peticion pa tereno pa plantacion, kico tur ta e rekisitonan, si nan tur ta necesario ainda y con por haci pa agilis’e. Unabes cu ta cumpli cu tur cos e persona tin cu haya un contesta, sea si of no y esey ta loke nan kier haci, manera prome minister a expresa.