Den su reunion cu director di Directie Buitenlandse Betrekkingen (DBB) Jocelyn Croes, Minister Plenipotenciario mr. Ady Thijsen a papia riba cu lo mester defini kico Arubahuis ta spera di DBB y cu conhuntamente lo mester yega na maneranan di cooperacion cu ta practico.
Tambe presenta na e combersacion tabata Olivia Croes, director interino di DBB y Shandra John, hurista di Arubahuis.
Den e combersacion aki tambe a toca e tema di e Conferencia di Embahador cu lo mester tuma lugar na Aruba. Banda di esaki lo mester papia riba compromisonan cu embahadanan y tambe stipula un jaarplanning di embahadornan cu ta desea di bishita Aruba.
Sra. Croes a papia riba loke ta wordo yama diplomacia economico, cu antes tabata cay bao di e ministerio di Asuntonan Economico, pero awor a bira parti di e maneho di e Ministerio pa Asuntonan di Exterior. Riba e tereno aki tambe lo mester busca manera pa coopera cu otro.
Minister Thijsen a menciona den su combersacion cu e director di DBB e asunto rond di e asina yama Zona Economico Exclusivo (Exclusieve Economische Zone) cu ta cubri 200 miya di lama for di costa di Aruba. Dentro di e zona aki e pais tin algun derecho, manera e derecho di explotacion na materia prima, derecho riba pesca den e zona aki y tambe investigacionnan cientifico. DBB lo bay mira kico e acuerdo cu Venezuela ta encera y tambe lo mester mira cu si ta existi un un acuerdo cu Republica Dominicana cu tambe ta forma frontera cu e zona aki
Sra. Croes a papia riba su trabao como director nobo na DBB y pa traha riba un “instellingsbesluit” pa DBB. Tambe ela menciona e proceso pa BEUK (Buro Europese Unie en Koninkrijksrelatie), cu actualmente ta un buro riba su mes, lo mester incorpora cu DBB.
Finalmente Minister Thijsen a gradici sra. Croes pa e combersaacion, mirando cu DBB ta un di e departamentonan cu Arubahuis ta traha masha estrecho cune.
E potret ta cortesia di Arubahuis
