(NTN24) – Varios sector di Colombia ta continua den estado di conmocion debi na e reciente homicidio di un muhe na un centro comercial reconoci di e capital Colombiano durante e celebracion di Dia Internacional di Mama, diadomingo ultimo.

Un ekipo di Cuerpo Tecnico di Investigacion (CTI) y un fiscal specialisa ta adelanta e investigacionnan cu e fin di establece un contexto di loke a pasa y den sentido ey tan ta check videonan di camaranan di siguridad, nan ta haci entrevistanan na diferente testigo y ta recolecta elementonan probatorio.

Tres dia prome cu diadomingo, un empleado di un luga di cuminda di nomber Erika Aponte Lugo di 26 aña a denuncia e menasanan di e cual tabata victima di e asesino. Aunke el a ricibi apoyo, esey no a garantisa su bida.

Secretario distrital di hende muhe, Diana Rodriguez Franco a condena e lamentabel suceso. “Ni e curpa, ni hende muhe ta propiedad di e hombernan,” el a resalta y a invita e ciudadanonan pa denuncia na autoridadnan casonan di maltrato y menasa.

“Den efecto, e ciudadano aki a actua corectamente, el a activa e ruta, el a bay warda di polis y a sigui e pasonan adecua. Institucionnan ta actua y nos a contesta den menos di 24 ora, pero e machismo ta surpasa e capacidadnan y reglamentonan legal. Ta bay mas leu cu e feminicida cu ta dicidi di mata, cu den caso aki el a haci tur lo posibel pa haciel’e” e funcionario a sigura.

Yiseth amiga di e victima a señala cu Erika tabata un muhe alegre, cu tabata stima su yiu riba tur cos, e tabata gusta cushina y su trabou tabata trata di cuminda. E tabata balente y tabata gusta brommernan.

Erika Aponte Lugo ken simannan atras a tuma e determinacion di separa di su pareha, ta laga su yiu chikito di 8 aña. Ken te ayera tabata bao e proteccion di Instituto Colombiano di Bienestar Familiar.

E asesino Christian Camilo Rincon Diaz ken tabata pareha di dje a yega di sorpresa na Erika su trabou na unda el a tir’e y a mat’e cu un arma di candela pa secondenan despues el a tira su mes y a muri dialuna ultimo den un centro clinico di Bogota.

Segun autoridadnan Colombiano, durante 2022, na Colombia a registra 995 feminicidio di hende muhe na e pais. 40% di nan a sucede den areanan rural.