Dia 15 di mei ta conoci internacionalmente como Dia Internacional di Famia. Un dia cu ta brinda oportunidad pa promove y conscientisa ariba e problemanan relaciona cu famia y aumenta e conocemento di e procesonan social, economico y demografico cu ta afecta e famianan. Nacionnan Uni (UN) a declara e tema pa e aña aki ‘Tendencia demografico y famia.’
Na final di 2022 e poblacion mundial a yega e cifra di 8 biyon hende, un gran logro pa e desaroyo humano cual, segun UN, ta demostra e avancenan den area di salud cu ta prolonga e bida humano. E crecemento demografico lo continua y ta premira cu pa 2050 e poblacion lo alcansa 9800 miyon y pa 2100 esaki lo bira 11.200 miyon. Esaki, e organisacion ta remarca, ta aumenta e preocupacion pa e perspectivanan di urbanisacion sostenibel y e gestion di e cambio climatico.
Cambio demografico ta un di e tendencianan mas importante cu ta impacta mundo, e bida y bienestar di e famianan rond mundo. E tendencianan demografico ta determina principalmente pa e patronchinan di fertilidad y mortalidad. E caida di e cifra di fertilidad ta genera beneficionan pa e famianan, ya cu nan por inverti mas den salud y educacion di nan yiunan, algo cu na mesun momento ta yuda reduci pobresa y mehora e desaroyo socioeconomico.
Investigacion realisa pa Nacionnan Uni ta indica cu e caida den fertilidad tambe ta aumenta e participacion laboral di hende muhe. Di otro banda, e caida aki ta duna como resultado famianan mas chikito cu tin menos probabilidad di enfrenta e cuido y obligacionnan di nan hogar.
Ademas e cifra abao di fertilidad por debilita e forsa laboral y e structura social di un pais, locual por provoca respuestanan drastico cu consecuencianan dificil di premira pa cuestionnan cu ta bay desde seguridad social te na igualdad di genero.
Na 1993 e Asamblea General a dicidi den un resolucion cu dia 15 di mei di cada aña ta ser celebra como e Dia Internacional di Famia. E dia aki ta brinda oportunidad pa promove y conscientisa ariba e problemanan relaciona cu famia y aumenta e conocemento di e procesonan social, economico y demografico cu ta afecta e famianan.
Dia 25 di september 2015, e 193 Estadonan miembro di Nacionnan Uni a adopta unanimamente e Sustainable Development Goals (SDG’s), un total di 17 obhetivo cu tin como meta elimina pobresa, discriminacion, abuso y mortonan prevenibel, aborda e destruccion di medio ambiente y marca e comienso di un era di desaroyo pa un y tur. Famia-, politica- y programanan orienta pa famia ta vital pa e logro di hopi di e metanan aki.
