Den ultimo dianan durante conferencia di clima y energia na Aruba, tambe a toca e tema di e proyecto di Eagle LNG. Sinembargo, e acuerdo cu gobierno di Aruba a firma cu e compania ta keda un secreto, y un bista mas di cerca ta revela posible conflicto di interes den e proyecto aki.

Na fin di 2021, a firma un acuerdo entre Eagle LNG y WEB NV pa almacenahe di LNG na Aruba y suministro di gas na WEB NV. Sinembargo, e eventonan cu a conduci na e firma di e acuerdo aki ta genera pregunta tocante posible nepotismo y conflicto di interes, cual lo ta un violacion serio di integridad – un palabra cu ta hopi den boca di e actual gabinete Wever-Croes II.

E sospecha di nepotismo y conflicto di interes ta basa riba varios hecho, manera Fundacion Gobernacion di Calidad (SDBA pa su sigla na Hulandes) a indica den un carta dirigi na prome minister Evelyn Wever-Croes.

Gabinete Wever-Croes I a expresa desde comienso un preferencia pa e propuesta di Eagle LNG pa establece un terminal di gas na Aruba pa suministro di gas pa e refineria – cu ainda mester habri back – y WEB NV. Sinembargo, reapertura di e refineria tabata den duda serio pa motibo di su estado deplorable y e tendencia mundial di reduccion di dependencia riba combustible fossiel. Aparentemente, management di WEB no tabata di acuerdo cu escogencia di gobierno, y como resultado, probablemente a nenga di mara WEB na un compromiso caro y largo. Gobierno a resolve esaki door di ofrece un “golden handshake” na ambos e CEO y CFO di e compania.

“Den nos opinion no tabatin motibo pa retira y nos lo a resisti contra esey. Pero tabatin un acercamento y negociacion net prome cu e reunion. Tabatin un oferta cu mi cliente no por a rechasa, y a haci un areglo, unda e partidonan a yega na un acuerdo pa retiro.” Abogado David Kock no por a splica kico a conduci na e situacion aki. E no tabata involucra te cu e conflicto cu a conduci na e “golden handshake.” Pero si el a bisa cu e acuerdo ta inclui un obligacion di secresia como parti di e pakete – pues no por bisa nada di e disputa ni kico a conduci na e perdida di confiansa.

WEB tambe a nenga di duna comentario, bisando cu “ningun di e partidonan por papia negativo di e otro of duna comentario.” E retiro di e dos director claramente a habri caminda pa un persona di confiansa di gobierno, Sr. Wever, kende ta sua di prome minister. Esaki a completa e circulo den cual tur posicion clave den gobierno, compania y representacion legal tabata tuma pa “miembro di famia cercano”:
*Prome minister ta representa e pais como accionista di mas grandi pa tanto RdA como WEB;
*Minister di Energia (RdA y WEB) ta su sobrino;
*Su ruman ta presidente di RdA, unda mester construi e terminal pa e proyecto;
*E cliente principal ta WEB, awo dirigi pa e sua;
*E bufete legal di tata di prome minister, Sr. H. Croes ta representa tanto RdA como Utilities.

Utilities ta e “organisacion umbrella” riba WEB y Elmar cu ta maneha e asuntonan financiero di ambos compania y e tempo ey a saca un prestamo di Afl. 700 miyon for di Finance Quest – cual un di su partnernan ta un iha di Sr. Hendrick Croes.

Den un fase anterior na comienso di gabinete Wever-Croes I, prome minister a nombra abogado Anthony Ruiz kende ta traha pa e bufete menciona, na e Hunta Supervisor di Utilities pa representa “Pais Aruba.”
Mientras tanto, Anthony Rojer, ex-parlamentario di MEP y esposo di un coordinador di Prome Minister tambe a keda nombra como director di Utilities. Como resultado, por a completa e acuerdo completamente tapa for di mundo exterior dentro di un circulo di famia y amigo, y ta practicamente imposible pa obtene informacion confiable riba esaki. Esaki ta straño mirando cu gobierno ta e unico accionista, pero Parlamento no por verifica si ta sirbi e miho interes di e pais. No por determina si a haci e acuerdo na beneficio di Aruba of si e propio interes di esnan involucra – talbes e distribucion di un ‘finder’s fee significante? – tabata liderando, mientras e interes di Aruba tabata subordina na esaki. E hecho cu tanto parlamentario como ministernan – di Integridad y Asunto Economico – di partido di coalicion Raiz no a sostene e acuerdo aki ta preocupante.

Bon Dia Aruba a nota e falta di transparencia aki, skirbiendo na 2021:

CEO di Eagle LNG no kier a amplia riba e contract cu a cera. Bon Dia Aruba a acerca Sr. Wever personalmente, manera cu Minister Croes a sugeri, pero Sr. Wever a bisa cu e mester a bay y si tabata por a manda e preguntanan por escrito. Y a haci esey e mesun dia. Tambe a manda e pregunta pa Ministerio di Energia. Y for di ningun a haya contesta. Es mas, vocero di WEB, Sra. Dongen a bisa cu e no a ricibi aprobacion pa contesta e preguntanan. Pa transparencia y pa comunidad realisa cu ainda tin hopi pregunta riba e acuerdo aki, Bon Dia Aruba a dicidi pa publica esakinan e tempo aya, cual ta inclui entre otro:

Tin un clausula di boet si pa un of otro manera ni Eagle LNG no cumpli cu su obligacion of si Aruba kibra e contract? A palabra un compra minimo di LNG den cua cantidad den e siguiente 20 aña y esaki ta keda semper e minimo di compra? E motibo ta cu si kier bay na transicion pa renobable mester crea espacio pa esey tambe?

Con confiabel ta e transporte di LNG y despues den forma di gas, pues e fluho pa medio di pipanan pa WEB den porcentahe y esaki ta mara na un clausula di garantia?

Cua ta e gastonan anual pa compra di e LNG? Pa loke ta e costonan di HFO, cuanto esakinan lo baha si ta usa LNG di forma normal riba un dia promedio, na WEB? Lo sigui importa HFO via RDA despues di introduccion di LNG? Lo cumpra e HFO aki cu prijs fiho, pa medio di hedging? Of lo cumpra riba mercado internacional?

Cu e compra minimo di LNG, tin espacio ainda pa por inverti den fuentenan di energia solar y di biento, almanacemento di e energia (bateria), hidrogeno den e proximo 20 aña?

Mientras cu Eagle LNG ta trahando su planta, pues pa dos aña, lo mester sigui usa HFO. Lo hedge? Dos aña ta largo pa keda depende di mercado pa prijs di HFO. Kico ta keda e fuel di reserve of back up entre 2030 y 2050 banda di fuentenan alternativo. LNG? Of toch diesel of HFO? Of otro, por ehempel biodiesel.

Lo mester adapta leynan di Aruba pa usa LNG, ya cu ningun caminda ta menciona e producto. A studia e caso aki?

Papiando di ley, pakico no a laga e abogadonan di Brown mes maneha e negociacion cu Eagle LNG? Ken a duna asistencia legal na e negociacionnan? Y ken ta abogado awor di Eagle LNG? E cifranan di emision di CO2 no a inclui esunnan di refineria. Di con no? Y con lo haci esaki cu Eagle LNG? Aruba mes no por a traha su mesun planta di LNG? Cu ta menos di 110 miyon dollar.

A paga finders’ fee y no mester publica esaki den cuadro di transparencia pa mustra si aki ta trata interes general of interes individual? A mira den e plannan di transicion, particularmente pa WEB, pa evalua si compranan di turbinanan cu ta usa 100 porciento hidrogeno, en bes di Wartsilla, RECIP, cu nunca lo por draai 100 porciento riba hidrogeno?

Eagle LNG ta bisa di lo no produci gasnan CO2. Con? Pasobra LNG no ta liber di CO2. E produccion of emision di CO2 lo bay pa cuenta di WEB? Eagle LNG lo cumpra awa di WEB of nan mes lo produci. Con nan lo haci uso di fuentenan limpi di energia pa nan trabounan?

E necesidad pa publica e preguntanan aki a bin despues cu fuentenan a bolbe reitera cu e presion riba e dos ex-Director di WEB pa a bay di acuerdo cu e acuerdo di gas tabata enorme y cu ora cu esaki no a sucede, a bin un campaña pisa riba ambos Sr. Oduber como Sr. Ruiz pa tuma un Golden Handshake y entrega nan funcion. E dos ex-funcionario ta mara na un non-disclosure agreement cu no ta permiti nan papia. Pero esnan cu ta informa Bon Dia Aruba ta personanan cu sa con e proceso a cana. Bon Dia Aruba a keda insisti riba e contestanan.

Te e fecha di awe, e preguntanan aki ta keda sin contesta.