(NLTimes)—Cinco aña pasa, un grupo chikito di cientifico di cancer a reuniendo na un restaurant den un hospital di misa desconsagrado na Mainz, Alemania, a crea un plan atrevido: Nan lo test nan vacuna nobo di cancer contra un di e formanan mas virulento di e malesa, un cancer conoci di aparece back hasta despues cu pashent opera pa kita tumor.
Tin chens e vacuna no por preveni e recaida, algun cientifico a asumi, pero pashentnan tabata desespera. Y e velocidad cu cual e malesa di cancer di pancreas ta aparece back por ta un bentaha pa e cientificonan: Pa miho of pio, nan ta bay investiga si e vacuna lo yuda of no.
Diaranson e cientificonan a reporta cu e resultadonan a resalta e dudanan. E vacuna a provoca un respuesta di e sistema di immuun den mita di e pashentnan cu a ricibi tratamento, y nan no a mustra un recaida di nan cancer durante e curso di e estudio, locual ta un descubrimento cu expertonan ta describi como extremamente prometedor.
E estudio, publica den revista Nature, tabata un logro grandi den e movemento largo pa traha vacuna di cancer specificamente pa tumor di pashentnan individual.
Investigadonan na Memorial Sloan Kettering Cancer Center na New York a extrae tumornan di pashent y a manda muestra di esakinan pa Alemania. Eynan, cientificonan na BioNTech a analisa e makiyahe genetico di cierto proteina riba e superficie di e celnan di cancer.
Uzando e datonan genetico ey, cientificonan di BioNTech a produci vacunanan personalisa pa siña e sistema di immuun di cada pashent pa ataca e tumor. Manera e vacunanan di Covid—cual BioNTech tambe a produci—e vacunanan di cancer ta depende riba mensahero RNA. Den e caso aki, e vacuna ta instrui celnan di e pashent pa traha e mesun proteina cu tin den e tumor, cu e posibilidad pa provoca un respuesta di e sistema di immuun cu por yuda combati celnan di e cancer mes.
E estudio tabata chikito: Solamente 16 pashent, tur di nan di descendencia Europeo, a ricibi un vacuna, parti di e tratamento cu ta inclui kimoterapia y un medicamento diseña pa preveni cu e tumor por stroba respuesta di e sistema di immuun. Sinembargo e estudio no por a rechasa completamente e factornan fuera di e vacuna cu a contribui den un miho resultado den algun pashent.
Fuero di esey, “e costa un barera hopi grandi pa e tipo di vacunanan aki por wordo utilisa den un scala mas grandi,” segun Dr. Meeha Zaidi, ken ta un specialista di cancer di pancreas na John Hopkins University School of Medicine. Esey por crea diferencianan grandi den acceso.
Pero e hecho simpel cu cientificonan por crea, check e calidad di e vacunanan y suministra vacunanan personalisa asina lihe—pashent a cuminsa ricibi vacuna aproximadamente nuebe siman despues di a kita nan tumor—ta un señal prometedor.
Desde e comienso di e estudio den december 2019, BioNTech a recorta e proceso pa bou di seis siman. E compania tin e meta final pa por traha vacuna di cancer den cuatro siman.
Ademas, desde cu e compania a cuminsa test e vacuna casi un decada pasa, BioNTech a reduci e costo for di casi 35.000 dollar Americano pa cada dosis, pa menos cu 100.000 dollar, pa medio di automatisa algun parti di e produccion.
