Riba diasabra, minister di Husticia, Rocco Tjon hunto cu algun colega minister, miembronan di cuerpo policial y otro invitadonan a bin hunto pa inaugura e Plaza Tino Ruiz, cu ta rindi honor na e agente policial Tino Ruiz den feliz memoria.
Segun gobierno a publica den un relato, Tino tabata un polis ehemplar, dedica na su trabao, bo por bisa te hasta cu e tabata biba pa su trabao. No obstante cu kende bo papia den Cuerpo Policial, di su coleganan riba pia di trabao te cu alto mando, tur lo confirma esaki. Nan lo bisa tambe cu Tino semper tabata servicial y ta haci su trabao cu empatia.
“Agentenan Policial ta mas cu un persona den uniform. Nan ta tata, mama, ruman, yiu. Pues ta tur dia un tata, mama, ruman of yiu di un di nos ta pone nan bida na peliger y haci sacrificionan grandi pa sirbi y protege nos comunidad. E uniform cu cada Agente Policial ta bisti, ta trece un peso enorme cune, y hopi biaha nos no ta realisa e impacto grandi cu e trabao aki tin riba e Agentenan Policial y riba nan famia.
Cada bes cu un sirena zona of un noticia sali, e telefon di e agente policial ta zona. Y no ta Centrale Post ta yama, pero ta un ser keri di e Agente Policial ta yam’e pa ta sigur cu e ta bon y nada a pasa cune.
“Famianan di e Agentenan Policial como tambe e Agentenan Policial ta consciente di e retonan y peliger, pero asina mes nan a scoge pa haci e trabao noble aki. E peligernan ta scondi den cada skina. P’esey pa por eherce e trabao aki e ta rekeri profesionalismo, pasenshi, dedicacion y pasion. E ta un yamada!
E yamada aki ta bin cu su prijs. Manera a indica caba, e sacrificionan ta grandi”, segun minister Tjon.
“Cada biaha cu nos Agentenan Policial subi warda, nan y nan famianan, tin un deseo. Esey ta pa nan regresa cas bek sano y salvo. Asina mes, na 2017, a pesar cu nos ta consciente di e peligernan, nos a wordo confronta cu e hecho cu Tino, Tino su famia, y su coleganan a paga e prijs maximo, Tino no a regresa su cas despues di su warda.
“A menciona cu pa por eherce e trabao aki e ta rekeri di profesionalismo, pasenshi dedicacion y pasion. Pero tambe hermandad. Pues, e famia aki, cu yama Cuerpo Policial, a demostra caba con nan a surpasa retonan cu tabata mustra imposibel. Cuerpo Policial a sigui brinda servicio despues di e perdida di nan colega stima cu e mesun dedicacion di semper, y esaki tabata posibel door di e hermandad cu ta reina.
“Y p’esey e ta nos deseo cu e plaza aki, no solamente por percura pa Cuerpo Policial haya e balor cu nan merece den nos comunidad completo, pero tambe, pa cada ciudadano wordo recorda cu e trabao di Cuerpo Policial no ta uno facil y cu nan tambe ta tata, mama, ruman y yiu. Mas aun, pa e memoria di colega Tino Ruiz por fungi tambe, pues e plaza aki, como e simbolo pa sigui cultiva e hermandad den Cuerpo Policial.”
Manera comunidad por recorda, Tino Ruiz a fayece mientras tabata cumpli cu su deber na Boegoeroei, na momento cu un homber cu historia di problema mental a ataca e agente. Partner di e victima a tira mata e agresor. E patruya tabata respondiendo na un yamada tocante problema den famia. Mientras Ruiz a purba di intermedia, un di e persona a dal e cu un piedra grandi na su cabes. E otro agente a reacciona door di tira cu su arma di candela riba e sospechoso, di 40 aña di edad, kende a fayece pa resultado di su heridanan. Tino Ruiz a fayece cu 32 aña di edad.
