(TheConversation) – Ta mirando un aumento grandi den e imagen di abuso sexual crea cu webcam y otro dispositivo di grabacion mundialmente desde aña 2019, segun Internet Watch Foundation.

Plataformanan di rednan social y chatroom tabata metodonan mas comun usa pa facilita contacto cu mucha y abuso ta tuma luga ambos online y offline. Awo ta mira cada biaha cu mas frecuencia cu e predadornan ta usa avancenan den tecnologia pa ehecuta abuso sexual facilita pa tecnologia.

Na momento cu nan a ricibi acceso na un mucha su webcam, e predador por usa esaki pa graba, produci y distribui pornografia infantil.

The Conversation ta criminologonan cu ta studia crimen cibernetico. Nan investigacion actual ta examina e metodo di e predadornan online usa pa compromete e muchanan su webcam. Pa haci esaki, nan a haci como si nan ta mucha online pa asina observa e accionnan di e predadornan activo online personalmente.

Den e articulo aki lo trata algun di e puntonan cu a resalta den e investigacion y estudio aki.

Chatbot
 Nos a cuminsa pa medio di crea varios chatbot automatisa cu un perfil di hoben di 13 aña. Nos a lansa e chatbotnan aki pa atrae e predadornan online den varios chatroom y frecuentemente usa pa muchanan pa socialisa. E botnan aki nunca a inicia un combersacion y tabata programa pa contesta solamente personanan cu ta identifica como un persona di mas di 18 aña di edad.

Nos a programa e bot pa cuminsa cualkier combersacion bisando nan edad, genero y localidad. Esaki ta un practica comun den cultura di chatroom y ta sigura cu e combersacionnan graba tabata cu adultonan di 18 aña cu ta al tanto di e supuesto edad di e mucha. Aunke ta posibel cu algun di e suhetonan tabata menor di edad y pretende di ta adulto, investigacion anterior a mustra cu predadornan online usualmente ta presenta nan mes como mas hoben di loke nan ta en realidad y no mas bieu.

Metodo di Atake

En total, e chatbot a graba 953 combersacion cu adultonan kendenan tabata sa cu nan ta papiando cu un mucha di 13 aña. Casi tur e combersacionnan aki tabata sexual y tabatin enfasis riba webcam. Algun di e predadornan aki tabata hopi explicito den nan deseo y inmediatamente a ofrece pago pa e videonan di e mucha cu ta ehecutando actonan sexual. Otronan a purba di pidi videonan cu promesanan di amor y un relacion romantico den futuro. Ademas di e tacticanan usa comunmente aki, nos a mira cu 39 porciento di tur e combersacionnan tabata inclui un link cu no tabata solicita.

Despues di a conduci un investigacion forensico di e linknan aki, a haya cu 19 porciento di e link tabatin virus, 5 porciento tabata dirigi e mucha na sitio web pa horta nan identidad y 41 porciento tabata asocia cu Whereby, un plataforma di conferencia via videocamara opera pa un compania na Noruega.

A keda inmediatamente cla con e linknan aki ta yuda e predador victimisa e muchanan. Predadornan online ta haci uso di e virus pa compromete e mucha su computer y asina haya acceso na nan webcam. E sitionan web ta usa pa haya e mucha su informacion priva, cual ta yuda nan pidi algo a cambia di no publica nan identidad online pero tambe ta duna acceso na e mucha su password, cual tambe por duna e predador acceso na e mucha su webcam eventualmente.

E metodo di atake riba Whereby tabata un poco confuso na comienso, sinembargo a mira cu e predadornan por explota algun funcion di e plataforma unda nan por mira y graba e muchanan si cu nan ta activo y sin cu nan duna nan consentimento. E metodo di atake aki por simplifica abuso sexual online. E predador no mester ta un persona tecnico cu sa hopi di computer ni tampoco mester haci uso di manipulacionnan social pa haya acceso na e mucha su webcam. Solamente e lo mester convence e victima di drenta un sitio web inocente, unda sin cu nan sa nan ta duna e predador acceso na e victima su camara.

Basa riba su analisis, e ta posibel cu e predador por usa Whereby pa controla un mucha su webcam via un livestream di e video riba un sitio web di nan escogencia. Un desaroyador di programa cu un cuenta di Whereby a haci un test, den cual a mira cu e doño di e cuenta por sende e victima su camara. E test aki a confirma cu e ta posibel pa cende e victima su camara sin cu nan sa.

No a haya evidencia cu ta sugeri cu otro plataformanan similar manera Zoom, Bluejeans, WebEx, GoogleMeet, GoTo Meeting y Microsoft Teams por ser explota di e mesun manera.

Mantene nos muchanan safe online

Conscientisacion ta e prime paso den direccion di un espacio cibernetico safe. Nos ta reportando e metodonan aki di atake pa asina mayornan y creadornan di politica por proteha y educa nos poblacion vulnerable.

Awo cu compania di videoconferencia ta al tanto di e posibel explotacionnan aki, nan por ahusta nan plataforma pa evita e tipo di explotacion aki. Move den direccion unda privacidad ta un prioridad tambe por preveni esaki.

Como mayor of persona responsabel pa un mucha, mester monitor e mucha su actividad online. E anonimidad cu rednan social ta provee ta facilita e contacto inicial cu por caba na abuso sexual online. Desconocidonan online ta keda hende desconoci, siña nos muchanan di e peligernan cu esaki ta trece, e asina yama “Stranger Danger.”