(Infobae) – E supuesto herederonan di e imperio criminal di Joaquin Guzman Loera, conoci como “El Chapo”, a defende nan mes via un carta di e acusacionnan cu e gobierno Mericano a haci den nan contra.

E yiunan di Joaquin “El Chapo” Guzman Loera a dirigi un carta na e opinion publico pa asina nan conta nan version di e acusacionnan recien cu e administracion di control di droga, conoci como DEA, a haci den nan contra, acusando e rumannan di tin un rol den e trafico di fentanyl na Merca.

E carta a keda entrega na ekipo di e periodista Azucena Uresti. Primordialmente, e yiunan di El Chapo a aclaria cu nan no ta conecta na e cartel di Sinaloa ni e operacionnan di droga na Merca. “Nos no ta e cabes di e cartel di Sinaloa ni tampoco nos ta interesa den bira e cabes,” ta un di e prome frasenan inclui den e carta. Tocante e presencia di e crimen organisa den e region, nan a argumenta cu ta trata di un “cantidad di grupo chikito y grandi cu tin nan base di operacion na Merca of ta integra pa e personanan di Sinaloa.”

Ademas, nan a acusa como un “acto di publicidad” su denominacion conhunto como “Los Chapitos” y a sigura cu tin “gruponan independiente” cu ta utilisa tanto nan nomber como esun di su tata pa asina por “traha cu libertad completo” y beneficia di e reconocimento internacional.

Den documentonan recien di Corte den e districto sur di New York, e autoridadnan hudicial a detaya con desde 2024 “Los Chapitos” a aumenta y perfecciona nan red di trafico di fentanyl na Merca. Tocante e rol cu cada yiu a hunga den esaki, e documentonan a detaya cu Ivan Archivaldo Guzman Salazar tabata e hefe di siguridad y comandante di e sicarionan di e grupo. Jesus Alfredo di su parti tambe tabata encarga di e labornan di siguridad y di coordina e recepcion di e kimiconan y fentanyl di China. Ambos tabata señala di a motiva violencia di manera directo y di a ordena tortura y asesinato.

Joaquin Guzman Lopez, conoci manera “El Güero” a asumi e rol di ta un di e operadornan principal di e cartel, encarga cu e trafico di cocaina, heroina, metanfetamina y marihuana na Merca y tambe di ta encarga cu e labamento di placa di e ganashi cu e organisacion genera.

Den su respuesta dirigi na DEA, e rumannan a reconoce e presencia di fentanilo na Sinaloa, pa motibo cu “tin hopi persona cu ta traha esaki” pero tambe a desvincula nan mes di e operacionnan relaciona cu e opioide. “Nunca nos a traha cu fentanyl,” nan a declara.

Otro tema di cual nan a distancia nan mes via e carta ta tocante pleito cu e grupo Los Zetas, comentando cu “nunca nos a involucra den guera of diferencia algun contra e grupo denomina Los Zetas, pa cual nan por bisa cu nos a participa den homicidio contra su integrantenan,” haciendo referencia na e versionnan cu ta señala Iván Archivaldo y Jesús Alfredo di a tortura y asesina 3 integrante di e cartel Los Zetas den aña 2017 na Navolato.