(AP) — Hefe di Nacionnan Uni a adverti den bispo di Dia Mundial di Libertad di Prensa cu medionan di comunicacion ta bao atake den tur skina na mundo, y a urgi tur nacion pa stop e agresion contra berdad y esnan cu ta reporta esaki.
Secretario-General Antonio Guterres a referi na e aumento di 50% riba asesinato di trahadornan den medionan na 2022 “increible,” insistiendo cu libertad di prensa “ta e fundeshi di democracia y husticia” y ta bao menasa.
Al menos 67 trahador di medionan a bira victima di asesinato na 2022. Ademas, plataformanan digital y rednan social a hacie mas facil pa extremistanan pusha narativanan falso y acosa periodista.
“Berdad ta menasa pa desinformacion y lenguahe di odio buscando pa bruha e linea entre hecho y ficcion, entre ciencia y conspiracion,” Guterres a bisa.
Guterres a bisa cu e collapse di industria di comunicacion, cual a conduci na ceramento di noticieronan local y consolidacion di medionan “den man di algun tiki” ta menasando libertad di expresion.
Mesun cos ta e leynan nobo menasante aproba pa gobiernonan mundialmente, manera ley di Rusia na 2022 cu cualkier persona publicando informacion tocante su ehercito cu Moscu considera falso por enfrenta hasta 15 aña den prison.
Guterres fuertemente a critica e agresion contra trahadornan di comunicacion tanto online como offline, bisando cu rutinariamente ta acosa, intimida y detene nan. El a agrega cu casi tres cuarta parti di periodista femenino a experimenta violencia online, y un cuarta parti a ser menasa fisicamente.
Guterres a haci e comentarionan den un mensahe di video pa e conmemoracion di ONU di e di 30 aniversario di Dia Mundial di Libertad di Prensa, cual Asamblea General di ONU a proclama pa prome biaha na december 1993 y a autorisa pa tuma lugar tur 3 di mei.
E Secretario-General a bisa cu mundo mester uni pa stop menasa, atake y encarcelamento di periodista pa haci nan trabao, y pa stop mentira y desinformacion. “Manera periodista ta para pa berdad, mundo mester para cu nan,” el a bisa.
