(AP) — Autoridadnan na Texas a keda obstaculisa pa un di cuatro dia ayera den na buskeda pa un homber acusa di tira cu arma di candela na cas di su bisiña y mata cinco persona.
E buskeda pa Francisco Oropeza, 38, a cuminsa diabierna ultimo ora el a huy for di escena di e tiramento mortal den pueblo rural di Cleveland, como 72km nort di Houston.
E tiramento a sucede despues cu bisiñanan di Oropeza a pidie pa stop di tira cu arma di candela den su cura pasobra tabatin un baby ta purba drumi. Mama di e baby y su ruman di 9 aña ta entre e cinco asesina, kende tur tabata originario di Honduras.
Un agente di FBI a reconoce dialuna cu autoridadnan tin tiki pisa den e buskeda pa Oropeza. Mas di 250 agente di ley di varios agencia, incluyendo US Marshals, ta tumando parti den e buskeda, cual no a duna resultado a pesar di personal adicional, cacho di rastreo, drone y un recompensa di $80mil ofreci.
Dialuna un presencia pisa di polis a descende na Montgomery County despues di un posible bista di e sospechoso, pero oficina di sherff despues a bisa cu Oropeza no tabata entre e personanan interoga.
Oropeza ta un ciudadano Mexicano kende a keda deporta cuatro biaha, segun Agencia di Inmigracion y Aduana Mericano. A deporta Oropeza na maart 20019, september di e mesun aña, januari di 2012 y mas recientemente na juli di 2016.
FBI na Houston a tweet diadomingo cu tabata referiendo na e sospechoso como Oropesa, no Oropeza, pa “miho refleha su identidad den sistemanan di ley.” Su famia ta lista nan nomber como Oropeza riba un borchi pafo di nan cura, como tambe den registronan oficial.
Dia di e suceso
Bisiñanan frecuentemente ta tira cu arma di candela den e comunidad rural pa relaha. Pero Wilson Garcia a bisa cu su baby tabatin problema pa drumi cu e zonido, pues e y otro dos hende a pidi Oropeza pa move su tiramento leu for di nan cas.
Despues cu Oropeza a rechasa e solicitud, e famia varios biaha a yama polis, Garcia a recorda diadomingo. El a agrega cu mientras tabata warda pa ayudo, Oropeza a core na dje y a recarga. Cas di Garcia tabata yen cu 15 persona, varios di nan amigo cu tabat’ey pa compaña esposa di Garcia den un retiro di iglesia.
Esposa di Garcia, Sonia Argentina Guzman, 25, y su yiu di 9 aña, Daniel Enrique Laso, a ser mata hunto cu Diana Velazquez Alvarado, 21; Julisa Molina Rivera, 31; y Jose Jonathan Casarez, 18. A tira dos di e victimanan mientras nan tabata cubri baby di Garcia y su yiu di 2 aña.
Kico ta problema cu migracion?
Gobernador Republicano, Greg Abbott a enfrenta critica pa a hala atencion riba e status di inmigracion di e victimanan. Abbott a ofrece un recompensa di $50mil durante weekend pa cualkier tip cu por conduci na aresto di e sospechoso, y mientras haci esey, a describi e victimanan como “inmigrante ilegal” – un declaracion potencialmente falso cual su oficina a rechasa y a pidi disculpa riba dialuna.
Criticonan ta acusa Abbott, kende a haci reforma di inmigracion un asunto clave na Texas, di inyecta politica den e tiramento tragico.
“Nos a haya sa cu al menos un di e victimanan por tabata na Merca legalmente,” vocero di Abbott, Renae Eze a bisa den un declaracion. “Nos ta lamenta si e informacion tabata incorecto y a distrae for di e meta importante di haya y aresta e criminal.”
Eze a bisa cu informacion duna pa oficialnan federal despues di e tiramento ta indica cu e sospechoso y victimanan tabata den e pais ilegalmente.
