Recientemente Minister Geoffrey Wever, conhuntamente cu arkitecto Raffy Kock, Sr. Marlon Croes y Sr. Francis Gomez di DOW, a sinta cu San Nicolas Business Association (SNBA), propretario di Kutlture Cafe, y tambe di ArtisA Art Gallery pa presenta e diferente iniciativanan cu ta den preparacion pa ehecucion den 2023 y 2024. Durante di e sesion di informacion aki arkitecto Sr. Raffy Kock, encarga cu e diseñonan pa e prome fase, a presenta e area di enfoke den centro di San Nicolas cu lo ricibi inversion den e periodo nos dilanti.
Durante e sesion di informacion aki esnan presente a haya e oportunidad pa duna nan input y feedback ariba e idea nan presenta cu lo mester conduci na un plan concreto y sosteni pa comercio den centro di San Nicolas.
San Nicolas Business Asocciation(SNBA) y comerciantenan presente a expresa cu e inversionnan cu gobierno kier haci den centro di San Nicolas ta bon bini. E area cu gobierno a indica di kier inverti den dje – cual ta e area rond di Plaza Lolita cu ta conecta e caminda di B. v/d Veen Zeppenfeldstraat pabou y e mainstreet pariba – ta carga aprobacion. SNBA a remarca si cu den pasado a haci inversionnan cuantioso den e area pero esaki no a conduci na e resultadonan desea; esta mas bida den centro di ciudad di San Nicolas.
Minister Geoffrey Wever a expresa di ta consciente cu e fondonan ta limita pero cu esaki no mester stop nos di cuminsa. E proceso pa yega na resultadonan concreto manera esnan cu ta tumando lugar pa den centro di Oranjestad ta uno largo, pero necesario.
Trece confiansa entre inversionistanan y consumidornan den centro di ciudad di San Nicolas ta e meta principal di Minister Geoffrey Wever. SNBA a expresa di kier enfoca riba impulsa e comercio di mainstreet, vooral e parti mas pariba, y a presenta algun di nan ideanan cu nan tin pa e area aki. SNBA no ta wak solamente embeyecemento, pero tambe e control social como uno hopi importante pa por logra e meta di revitalisa centro di San Nicolas, Presidente di SNBA a subraya.
Comerciantenan di mainstreet banda pabou di San Nicolas ultimo tempo a midi un subida drastico di bishitante, specialmente di turista, y ta sumamente contento cu esey. Nan a sigui bisa cu turista nan ta buscando un experiencia unico y autentico, cual nan ta ofrece. Segun Sr. Nicolas Gordon, propietario di Kulture Cafe, no tin suficiente establecimento di F&B na e momento aki den e “mainstreet pabou” pa acapara e fluho di bishitantenan. E animo nan ta halto y segun Sr. Tito Bolivar, Aruba Art Fair por sigui expande y lo por tuma luga den e area rond di Plaza Lolita den futuro si algun condicion necesario wordo logra. Aspecto di seguridad y accesibilidad na espacio di parkeer den nan area ta puntonan importante.
Minister Wever a tuma nota di e puntonan aki y a informa cu su intencion ta pa inverti no solamente den embeyecemento, pero tambe subi e funcionabilidad di e area. “Un area atractivo den e sentido di entretenimento continuo cu lo mester crea e fluho necesario di bishitante pa por sostene actividad comercial henter aña den centro di San Nicolas” Minister Wever a finalisa bisando.
Den algun siman lo presenta e diseño di e proyecto preliminar na tur cu tabata presente durante e ultimo sesion di informacion pa despues di e final input di e stakeholders, por finalisa e diseño di e proyecto y por inicia e proceso di destaho publico y ehecucion di e proyecto.
