Vereniging Rijschool Aruba (VRA) ta sigui preocupa pa ley di trafico

Thomas Ruiz, secretario di VRA y miembro di comision di verzelfstandiging di bureau examen rijbewijzen, a splica cu na e momentonan aki nan ta reformando rijbewijs examen pa asina duna mas importancia na diferente punto cu mester di atencion.

Den un entrevista cu Bon Dia Aruba, Ruiz conhuntamente cu Wilfred Hart – ken ta un ex-polis hefe di trafico y awor ta pensionado – a señala cu a acerca diferente medio di comunicacion pa expresa e preocupacion cu nan tin tocante locual nan ta bin constatando ora nan ta haci investigacion tocante seguridad den trafico.

Un di e puntonan cu nan kier trece dilanti ta e parti di trailer, cu na e momentonan aki na Aruba “ta un free for all.” Nan ta mira un cantidad di entre 90 pa 100 trailer no ta adapta nan mes na leynan di trafico vigente.

Hende coriendo auto sin rijbewijs

Un di otro punto cu nan kier a trece dilanti ta hende cu ta core auto sin rijbewijs. Esey por ta debi na diferente factor, por ehemplo, hende ta considera cu prijs di rijbewijs ta mucho halto, nan ta bisa cu nan no tin mester di dje debi cu no tin mucho control di Polis, of e problematica cu ta pasa den departamento.

“Nos a yega di bisa na minister caba, te cu awe nos ta haya cu hende cu ta bisa cu tin fraude, pero ora bo ta puntra nan pa entrega un denuncia, e hendenan aki ta bisa no pasobra nan no kier represalia,” Ruiz a sigura.

Nan tin conocemento cu fraude a tuma luga den pasado tempo cu un hende a cay cera. Y no ta nada straño pa nan si esey por ta pasando aworaki, pa e motibo ey nan ta purba di evita esaki trahando conhuntamente cu departamento. “Pero ainda nos ta tende cu e co’i ta bin for di candidatonan y di un manera of otro nos ta purba di fren’e.”

E problematica di hende cu a haya rijbewijs mediante fraude ta representa un peliger pa trafico, pa motibo cu nan no sa ki pa haci ora nan ta yega na un crusada. Tambe tin esnan cu a haya nan rijbewijs y nan a lubida tur cos, ademas di esnan cu a no tin rijbewijs y tampoco sa ki pa haci den un crusada.

Ley di trafico a cambia na aña 2000. Tur persona cu a pasa examen prome den e sistema bieu no sa di e cambionan. Ruiz y Hart ta di opinion cu si ta posibel pa den futuro por tin un oficina aparte cu tur e datonan aki cu por deal cu esey, debi cu na Aruba casi 100.000 auto ta core y autoridadnan tin bira mas streng pa esaki, pa tin mas control.

Problema cu idioma den examen di rijbewijs

Na e momentonan aki, nan ta purbando di drecha problema di idioma durante examen, pero manera Ruiz mes a bisa, nan tin un impasse cu e departamento den e manera con nan ta formula pregunta y contesta di examen, con nan ta usa e idioma. “Nos ta haya constantemente feedback di clientenan cu algo no ta bon den e manera con preguntanan y contestanan ta formula den tur idioma.”

Nan a trece esaki dilanti caba y nan a sugeri pa por ehemplo instala un tipo di comision pa por controla, debi cu hende cu no ta aproba examen tambe tin derecho di puntra kico a bay robes. Algun tempo atras, ora minister Andin Bikker tabata encarga cu esaki, Hart a participa pa un tempo cortico pero esey no a sigui mas. Nan kier pa instala e comision back y pa saca afo kico ta bayendo malo y kico ta bayendo bon.

Den esaki, Haart a expresa cu den examen pa chikito cu e por mustra, e ta un examen y tin cu laga expertonan trah’e pa ora nan ta bay les’e y contest’e tur hende por compronde.

Regulacion

E comision aki tambe ta mira cu nan como representante di e rijschoolnan no tin regulacion pa trafico y esey ta e motibo pakico nan a cuminsa traha mas cerca cu Corsou, Hulanda y Sint Maarten. Den esaki Ruiz a splica cu Corsou tin un sindicato y nan ta regula tur cos via ley. Na Aruba “no tin nada pa regula cu ta un rijschool oficial, cu ta inscribi na KvK, cu ta paga belasting por duna les di rijbewijs. Ademas e cliente no tin un garantia cu e persona cu ta duna les ta al tanto di e materia, dus aworaki bo ta haya cu cualkier hende cu hera a saca rijbewijs awe mañan nan ta duna les,” el a bisa.

Structura mal traha

Ruiz a haya chens di duna su disertacion na Comision Central di Parlamento di Aruba na november di aña 2022 tocante e puntonan aki, unda nan a enfatisa tocante examen teorico cu ta diferente na locual e persona ta bay haya den practica. Pero ademas, tin structura y caminda mal traha y borchi mal poni, segun el a declara. “Por ehemplo a pone borchi di parkeerplaats pa parlamentario, siendo cu tin un strepi geel den e rand di acera cu ta indica cu no mag di staciona ni riba, ni banda di e acera y esey ta ley. A traha un ministeriele beschikking pa esaki, pero esey no por bay riba ley.”

Un luga cu tin un parkeerplaats incorecto ta Linear Park, unda e luga di parkeer pa personanan handicap tin pintura y no un borchi. “Ley no ta conoce e pintura aki, ley ta conoce borchi,” Ruiz a señala.

Tin rotonde cu tin cu un borchi pero no tin e strepi pa un zebrapad, loke ta causa un confusion debi cu tanten cu no tin e strepi pinta, e no ta un zebrapad, manera un potret den e articulo aki ta ilustra.

Cifranan di accidente

Tocante esaki, Ruiz a menciona cu nan a haya cifranan di dalmento na unda el a splica esun cu ta tuma luga mas frecuentemente ta accidente di cadena. Den esaki el a señala cu tin aproximadamente mas di 1.000 dalmento di auto pa luna y autoridadnan concerni mester traha pa minimalisa esaki.

Nan como rijschool mester conscientisa e hendenan riba nan comportamento den trafico, cu ora un chauffeur tin un vehiculo di motor, e no ta e doño di e trafico sino cu e ta parti di e trafico, cu tin cu comparti e caminda cu peaton, ciclista y otronan. “Pero manera nos ta wak aworaki nos tin hopi mas hende riba caminda.”