(AP) – Ed Sheeran a bisa dialuna cu e ta ricibiendo mensahenan di sosten durante su huicio tocante copyright di otro artistanan kendenan tambe ta preocupa cu nan lo keda demanda mientras den e lucha unda cu ta acusa Sheeran di a horta material di Marvin Gaye su cantica “Let’s Get It On” pa crea un cantica mas o menos un decada atras.
E cantante Britanico a trece dilanti su defensa y a canta basta durante e di dos dia riba podium pa duna su testimonio y contesta pregunta den e huicio unda ta acusa su persona di a viola e derechonan di autor -copyiright- di e clasico cu Marvin Gaye a crea cu co autor Ed Townsend.
Sheeran a bisa cu el a ricibi mensahe di otro cantantenan desde cu e huicio a cuminsa siman pasa pa motibo cu nan ta preocupa pa haya nan mes den problemanan legal pa causa di nan canticanan. E no a identifica ningun di nan, pero a bisa cu nan ta expresando sosten. “Ora cu bo ta skirbi cantica, hende ta bin contra bo,” Sheeran a expresa.
E huicio cu awo ta drentando su di dos siman, ta bini for di un demanda cu Townsend su heredornan a otorga varios aña atras buscando compensacion cu te ainda no a keda specifica.
Durante e comentario di apertura Townsend su abogado Ben Crump a bisa cu videonan di un concerito na Zurich unda cu por mira Ed Sheeran ta cambia entre “Let’s Get It On” y “Thinking Out Loud” ta prueba contundente cu Sheeran tabata violando e derechonan di autor.
Sheeran su abogado Ilene Farkas, a contraresta Crump su acusacion pa medio di provee un mini concierto durante cual Sheeran a demostra con e por cambia entre e canticanan den un practica conoci como ‘mashup’. El a splica cu e ta haci uso di mashup pa “agrega algo diferente” na su conciertonan, generalmente scogiendo canticanan cu ta den e mesun notanan. “Si e ta un cantica di amor, bo ta combina esaki cu otro cantica di amor,” Sheeran a sigui splica, sugiriendo cu Elvis Presley su version di “Can’t Help Falling in Love” of Whitney Houston su version di “I Will Always Love You,” skirbi pa Dolly Parton lo combina bon cu “Thinking Out Loud.”
A yega un punto unda cu Farkas a puntra su cliente si su cantica a copia algo di “Let’s Get It On” na cual el a contesta cu no. Sheeran no a sconde con iritante eta haya e situacion ora cu el a ser examina pa e abogado Patrick Frank cu a haci pregunta tocante e testomonio di un experto.
Sheeran a bisa cu “si mi por ta honesto, mi ta kere loke e ta haciendo aki ta criminal,” el a expresa, agregando cu e no por kere cu un persona a tende su cantica y a “desbalora esaki pa medio di bisa cu el a hort’e. Mi ta haya esaki un insulto hopi grandi.”
