Supervision financiero… Derecho y deber…

Gobierno di Aruba tin menos di seis luna pa yega na un acuerdo cu gobierno Hulandes encuanto e prestamonan di emergencia den e crisis di Covid 2020. Sin embargo, awor caba e problemanan pa yega na tal acuerdo ta presente den tur posible claridad. Di un banda, actual gobierno di Aruba no ta desea un ley di supervision financiero, den ningun forma. A tolera e ley di Aruba cu anterior gobierno y gobierno di Hulanda a acorda, pero na e promer oportunidad pa deshaci di esaki, a trata di haci esey, pero di un manera meramente infantil. Contal cu e ley t’ey ainda y Aruba mester cumpli.

Cu e situaciona mas urgente ainda, pa via di e repago di e prestamonan di emergencia reciente, ta mustra mas dificil pa logra kita e ley di supervision for di caminda. Aruba ‘is not calling the shots’ den sentido absoluto, pero tin un aspecto na su fabor. Esey ta cu e ley di supervision financiero, esun di Reino (RAft), ta un ley a base di consenso. Esaki pasobra e ta un copia di e ley di supervision pa Curaçao y Sint Maarten, cu a mira luz di dia a traves di un proceso di saneamento di finanzas di loke tabata Antiyas Hulandes, y e ‘trade off’ cu a tuma lugar na 2010.

Awor, si gobierno di Aruba ta keda insisti cu e proceso na Aruba tabata di otro indole, nan tin razon, pasobra e ley di Aruba a bira realidad despues cu gobierno di Hulanda, y di Reino, a interveni a base di e necesidad cu a mira pa salba Aruba for di e abismo financiero den cual e tabata na punto di cay. Pues un intervencion a base di responsabilidad di Reino pa garantiza gobernacion adecua pa su ciudadanonan na Aruba: nan derecho y deber. Claro cu nos ta comprende cu awor e actual gabinete ta argumenta cu “esey tabata nan, no nos”. Esey ta realmente irelevante, pasobra como gobierno bo ta hereda ‘bon y malo’ di bo antecesor. Den e caso aki e supervision t’ey caba pa mas di 7 aña y no ta bay desaparece; simplemente Aruba no ta na e timon.

Fuera di esey, y ban ta franco: asina ehemplar Aruba tabata den e colaboracion pa combati e crisis recien hunto cu Hulanda? Nos conoce naturalmente e palabranan diplomatico cu ta intercambia di ambos banda na nan ocasion, pero tambe e suspironan di iritacion dentro di e colaboracion aki. Kico anto lo ta e puntonan positivo cu gobierno di Aruba por trece dilanti pa negocia un cuadro legal pa e situacion financiero cu por desvia di e modelo di supervision di 2010, cu na 2015 a sirbi como base pa e ley Arubano di supervision?

Nos sa tende opinion mal funda cu ta bisa cu Aruba mes por busca su financiamento. Esey ta un ponencia incorecto pasobra gobierno di Reino mester duna permiso pa cualkier prestamo cu no ta dentro di Reino. Y pa clarifica con e instancianan internacional di evaluacion financiero ta mira e asunto: promer pregunta di nan semper ta con e relacion cu Hulanda ta. Si mester bay busca prestamo riba mercado liber cu aprobacion di Reino, semper esaki lo tin un porcentahe mas halto di interes cu loke por haya a traves di Hulanda. Y si bay busca sin aprobacion di Hulanda ta imposible pa haya prestamo mes… Tur persona cu a yega di sinta na mesa cu Fitch, S&P y IMF, den cuadro di e evaluacion di Aruba, ta na altura di e hecho cu pa nan e posicion di Hulanda ta crucial, y ta loke a scapa nos di un caida mas profundo den rating, pasobra nan sa cu nunca Hulanda ta laga e asunto yega asina leu.

Relaciona cu esaki tin naturalmente e argumento di gobierno di Aruba cu “nos mes por” (maneha asunto financiero). Lo por mustra riba e hecho cu e corelacion entre debe publico y GDP a cuminza mehora y a baha bao di 100%, pa fin di 2022 na 96,6% segun e propio gobierno, pero esey ta mas a base di recuperacion economico y no pasobra gobierno a haci algo pa baha su propio gasto. Ademas, e ruta pa yega na menos di 50% di debe/GDP, e maximo tolerable pa economia chikito, ta uno bastante largo.

Y a traha plan pa reduci debe. Bao di e ‘trocemento di braza’ Hulandes a traha plan presupuestario multi-anual te cu 2027, y a publica nan. Por mira con den e proximo añanan (te cu 2027) gobierno ta bay percura pa un suma grandi di mas di 500 miyon florin na surplus, cuminzando e aña aki. Con leu esey ta bay acompaña pa reduccion di gasto di gobierno mes lo mester mira ainda, pero en todo caso tin ey e base di cuminza reduci debe publico. Nos no ta convenci cu sin supervision gobierno lo maneha e exceso di placa aki bon, sigur no pasobra te awor e sistema interno di control no ta na su lugar. Nos a caba di presencia un atraso di dos luna cu duna cuenta di finanzas di 2022, cu cuentanan anual di ultimo par di aña ‘nowhere to be seen’, mucho menos un declaracion aprobatorio di accountant riba cualkier cuenta anual. Laga supervision di Reino na e momento aki pa loke e ta lo ta lo peor cu Reino por haci pa su ciudadanonan na Aruba. Keto bay e derecho y deber t’ey…