Diaranson mainta mayoria scol rond Aruba a celebra Dai di Rey cu diferente actividad. Arco Iris Kleuterschool no a keda afo y a organisa un bunita actividad, parada di bicicleta pa su alumnonan festeha e cumpleaños di Rey Willem Alexander.
Arco Iris Kleuterschool pa hopi aña ta organisa su parada di bicicleta pa su alumnonan, pero durante e ultimo añanan aki no a logra organisa e actividad aki, principalmente pa motibo di e pandemia di COVID-19.
E aña aki, mirando cu tur cos a bolbe back na normalidad Arco Iris tabata un biaha mas riba cayanan di Oranjestad cu nan tradicional parada di bicicleta.
Alumnonan cu nan bicicleta of step, decora na colornan di e bandera di Hulanda a disfruta di e mainta aki cu tabata yen di ambiente, color y hopi alegria. Tur e klasnan a ricibi un color diferente di e bandera di Hulanda, blanco, blauw of cora, y tambe e color oraño cu ta representa e celebracion di Dia di Rey.
Mas di 120 alumno tabata riba caminda, mayoria riba nan bicicleta, hunto cu mayornan boluntario cu a coopera pa yuda wak pa e muchanan y mantene nan sigur ariba e careteranan di Aruba. Tambe tabatin presencia di EMS, den caso di emergencia y sin lubida Polis cu a guia e parada y a yuda habri caminda pa e muchanan por a core nan bicicleta sin problema di trafico.
E parada a sali for di Arco Iris Kleuterschool, a subi De LaSallestraat y a sigui riba Vondellaan. Di eynan e parada a bira subi riba George Madurostraat, a pasa dilanti Bioblioteca Nacional, despues a bira riba Adriaan Lacle Blvd y a regresa scol.
