Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Den su relato mas recien riba Indice di Prijs di Consumo, Bureau Central di Estadistica (CBS) a informa tocante e caida di prijs di petroleo den luna di maart.
Na Maart 2023 e prijs promedio pa bari di petroleo (US$73.51) a conoce un caida di US$ 3.48 (-4.5%) compara cu Februari 2023 (US$ 76.99).
Prijs di electricidad y di awa no a cambia compara cu Februari 2023. Consecuentemente, e prijs promedio di electricidad pa vivienda a keda Afl. 294.56, mientras cu e prijs promedio di awa pa vivienda a keda Afl. 168.73.
Prijs di gasolin a registra un caida di Afl. 4.90 cent (-1.9%) na Maart 2023 y a causa un efecto di -0.09 ppt riba e CPI. Prijs di diesel a registra un caida di Afl. 25.50 cent (-9.8%) na Maart 2023 y a causa un efecto di -0.04 ppt riba e CPI.
Na Maart 2023, utilidad, gasolin y diesel como grupo, tabatin un caida di prijs di 0.7% compara cu Februari 2023 y hunto tabatin un influencia di -0.13 ppt riba e CPI, mientras cu e restante 404 bienes y servicio hunto, a conoce un subida leve di prijs di 0.02% y tabatin un efecto di 0.02 ppt riba e CPI.
