(AP) — Presidente Joe Biden ta bay usa e bishita estatal celebratorio e siman aki di presidente Sur Koreano, Yoon Suk Yeol pa subraya cu Merca ta cla pa aumenta su esfuersonan pa disuadi un atake di Nort Korea riba Sur Korea, segun Cas Blanco.
Biden ta bay anuncia esfuersonan specifico nobo pa disuasion nuclear como tambe un iniciativa nobo di seguridad cibernetico, inversion economico y un asociacion educacional, parti di un esfuerso pa resalta e amplitud y profundidad di e relacion entre ambos pais mientras nan ta marca e di 70 aniversario di nan aliansa, segun consehero di seguridad nacional di Cas Blanco, Jake Sullivan a bisa.
Oficialnan di Cas Blanco ta bisa cu Biden tin speransa di pone enfasis particular riba e compromiso di Merca pa disuadi accion nuclear di Nort Korea, mientras Pyongyang a aumenta su test di misil balistico, incluyendo test di vuelo di un misil balistico intercontinental cu fuel solido pa prome biaha e luna aki. E di dos test ta ser mira como un posible avance den e esfuersonan di e Nort pa adkeri armanan mas poderoso y mas dificil pa detecta pa ataca e continente Mericano.
Sullivan no a duna ningun detaye riba e esfuersonan di disuacion nobo prome cu anuncio di e lidernan, pero a bisa cu Merca ta buscando pa manda un mensahe cla na Pyongyang tocante su retorica cada bes mas agresivo.
Biden tambe ta spera di usa e bishita, cuminsando awe, pa subraya e importancia di Sur Korea y Hapon construyendo riba nan lasonan di seguridad.
