(NLTimes)—Investigadonan no a mira ningun prueba di daño celebral den persona hospitalisa cu un infeccion severo di coronavirus, segun Universidad di Maastricht a reporta. A lansa e estudio despues cu dokternan a tuma nota di problemanan neurologico den pashent den cuido intensivo durante e prome ora di e coronavirus.
Pero hende cu a experencia esaki “no ta mustra señal di daño celebral for di e malesa despues cu a contrata esaki,” e universidad a splica. E estudio a analisa dos grupo di pashent cu coronavirus: 104 hende cu tabata den cuido regular y un otro 101 cu tabata den cuido intensivo. Nuebe luna despues cu a Sali for di hospital, e investigadonan a usa scan y test pa examina algun posibilidad di daño celebral y su consecuencianan, por ehempel problemanan cu memoria. Tambe nan a puntra tocante sintoma manera cansancio.
“Nos tabatin e expectativa cu hende den e grupo di cuido intensivo, kende tabata mas malo, lo tin mas daño celebral y pues mas keho,” Caroline van Heugten a splica, kende ta un profesor di neuropsicologia clinico na Maastricht. Pero esey no tabata e caso. “E scannan di MRI di e celebro tabata basta similar, cu e excepcion di nos a mira mas sangramento chikito den e scannan di pashent den cuido intensivo. Pashent cu sangramento chikito asina no tabatin mas malesa of sintoma.”
Tampoco tabatin diferencia den funcionnan di pensamento of bienestar psicologico entre e dos gruponan. Pero mas cu mita di e pashentnan analisa a sufri di keho manera cansancio, lubida hopi y dificultad cu concentracion. Kehonan asina tambe ta conoci como ‘Long COVID’ of ‘Post-COVID Conditions’ (PPC). Esaki ta aparece tambe den hende cu a wordo hospitalisa despues di un infeccion cu coronavirus, segun van Heugten. E causa di e keho aki ainda no ta conoci.
