Ayera tardi hues a dicta sentencia den e caso conoci como caso ‘Flor’, cu ta trata e incidente di violencia publico cu a involucra yiu di Prome Minister Evelyn Wever-Croes, Kevin Wever y yiunan di e conocido politico Micheal Williams, e rumannan Chris y Nigel Williams.

Hues a sentencia yiu Kevin Wever cu un castigo di 40 ora di trabao comunitario. A pidi 150 ora pa su participacion den e incidente kitando e tempo cu Wever tabata cera, esta 1 dia di detencion, cu ta ekivalente na 1 ora di trabao comunitario.

Chris y Nigel Williams a keda sentencia na cu castigo mas halto, cu ta 120 y 160 ora di trabao comunitario respectivamente. A pidi 150 y 180 ora, kitando tambe e dia e tempo cu nan a pasa cera, cu ta 2 y 3 ora di trabao comunitario.

E ultimo involucrado, fam Torres Mendez a ricibi e castigo mas halto compara cu e otro acusadonan, cu ta un castigo di 180 ora di trabao comunitario. A pidi 240 ora, y esaki tambe ta kitando e tempo, cinco dia, cu e el a pasa cera y cu ta ekivalente na 10 ora di trabao comunitario.

Motibo pakico Torres Mendez a ricibi e castigo mas severo ta pasobra el a herida un persona severamente e dia ey.

Den luna di november di aña 2021, e caso di violencia publico a tuma luga unda cu e yiu di e Prome Minister tabata na un restaurant den compania di amigonan y familiarnan celebrando e cumpleaños di su pareha. Segun Prome Minister indica durante un conferencia di prensa den luna di december di 2021, poco despues di e incidente, su yiu homber a wordo agredi di trishon, di patras, y tambe cu un boter di glas kibra pa un di e rumannan Williams.

E enfrentamento aki a cuminsa un pelea formal den e restaurant cu a resulta den destruccion di propiedad y un di chefnan di e restaurant a resulta herida. Yiu di e mandatario a entrega keho formal como victima na autoridadnan unda cu a bay over na detencion di Nigel Williams, ken despues a wordo laga den libertad. Investigacion a tuma luga pa algun tempo y basa ariba e invetgacion aki a saca orden di detencion pa yiu di mandatario Wever-Croes y tambe ruman di Nigel Williams, esta Christopher Williams, cu tambe a entrega su mes na polis.

E caso aki a acapara hopi atencion di comunidad mirando cu ta trata di yiu di Prome Minister di nos pais. Durante e rueda di prensa e tempo ey Minister President a enfatisa cu e personalmente no a eherce ningun presion ariba ningun departamento y menos den e parti hudicial como cu esaki no ta cay bao di su ministerio.