Fundacion Accion Ambiental preocupa pa desaroyo di hotel na Baby Beach

Fundacion Accion Ambiental (FAA) ta un NGO ambiental cu pa algun dia ta bin treciendo dilanti nan preocupacion pa hotel Secrets Baby Beach Resort. Ta expresa cu nan no ta contra niun desaroyo, pero mester proteha naturalesa cu tin rond di e area aki. E construccion di e hotel lo por nifica un posibel destruccion di tunnel y cueba cu tin centenares di aña y ta forma parti di historia di Sero Colorado.

Pa e motibo aki, FAA kier trece e realidad dilanti. Nan ta cumpliendo casi 30 aña cu nan ta den tereno di medio ambiente y esey no solamente ta encera e parti ambiental sino cuido di naturalesa, contaminacion di aire, di lama y tambe di tera, parti di loke tin di haci cu desaroyonan, sobrepoblacion, entre otro.

Nan tambe a participa den conferencia mundial di Nacionnan Uni na aña 1994 cu a tuma luga na Barbados pa loke ta Desaroyo Sostenibel, nan a haci rapportnan pa splica di forma detaya loke nan ta mira di e parti di medio ambiente cu mester cuid’e,

“Nos ta tuma nota cu hopi biaha gobierno y otro instancianan ta papia di desaroyo sostenibel, pero si nos ta wak bon no tin un desaroyo sostenibel. E ta basa su mes cu gobierno hunto cu su departamentonan cu ta encera cuido di nos naturalesa (DNM) entre otro, mester por hunto cu gobierno, sinta cu NGO’s manera Nacionnan Uni a proclama esey na aña 1992 pa loke ta agenda 21 y na 1994 ora cu nan a bin cu e conferencia mundial den caso aki di desaroyo sostenibel na Barbados,” Marcos Bislip di FAA a señala.

Nan ta mantene nan mes hopi estricto pa loke ta cuido di naturalesa y medio ambiente, debi cu prome cu aña 1972 tabatin hopi cos cu no tabata regula y dia 5 di juni di e aña ey, Nacionnan Uni a proclam’e como Dia Mundial di Medio Ambiente. For di eynan a cuminsa pone regla pa stipula esaki y por tin un miho coordinacion den medio ambiente mundialmente.

Un di ehemplo cu el a duna di esaki ta cu mayoria di hotel na Aruba ta traha den sitionan yama e “linea cora,” kiermen riba beach. En realidad mester a trah’e un tiki mas leu di e beach, pa motibo cu e ta un peliger den casonan di eventonan sismico of tsunami cu por trece olanan cu por lanta.

“Pero tur esaki a tuma luga prome cu aña 1972 y despues di esey e reglanan a bira mas estricto pa Nacionnan Uni cu a bin regula e reglanan. Hopi ta esnan cu ta trece hopi informacion incorecto padilanti y nos den parti ambiental ta mantene nos mes na e reglanan stricto,” el a sigura.

Tambe el ta bisa cu na momento cu a bin trece e regulacionnan den leynan di medio ambiente, a pone cu luganan cu tabatin construccion of tabata desaroya caba por traha otro proyecto. Por ehemplo ex-Nanki Club cu ta un luga cu a bay hopi atras, e tabata bandona y ta un bon luga pa desaroya un hotel of cualkier otro proyecto cu mester bay den reglanan di Nacionnan Uni. Pero tambe nan ta purba di proteha luganan cu nunca antes tabatin desaroyo of cu nunca tabatin un construccion riba dje, pa proteha e naturalesa.

Den esaki ta bin dilanti e proyecto di hotel Secrets Baby Beach Resort cu ta den baranca y cu tin cuebanan cu ta pasa for di abao di e casnan cu tin eybanda, akinan tin e Colony Cave esun di mas grandi di e tres isla di Antia Hulandes. Incluyendo e tunnel di awa yama Mangel Cora Wells cu ta hopi importante pa naturalesa, segun Bislip a sigura, debi cu ta genera awa cu ta bin for di dos banda, di lama pasa bao di Baby Beach y ta yega te e tunnel aki. Tambe ora awa ta yobe ta drenta door di e calichi. “Esaki a bira un parti asina importante di naturalesa pasobra e ta wordo forma pa naturalesa, e tabata yuda por medio di un mashin cu tabata pump e awa pa yega na refineria y pa fria e mashinnan, awor ta forma parti di nos historia y nos no por lag’e bay.”

Igualmente e ta sigura cu nan a protesta contra e parti di e hotel riba e tunnelnan di awa, pero nan a haci’e toch. “Nan a traha un otro hala di e hotel riba e tunnel di awa, algo cu e antiguo minister a bisa cu nan no ta bay traha riba e area aki. Nos tin potretnan unda por mira cu nan a trah’e net riba e tunnel ariba e dos viaducto di aire,” el a bisa.

Bislip ta enfoca riba e parti cu nan no ta contra e proyecto, pero importante ta pa cualkier desaroyo cu ta tuma luga por bay cu desaroyo sostenibel, loke ta nifica cu “gobierno mester sinta y scucha e NGO’s. Nos tin full un investigacion di e baranca aki cu diferente spilon y cuebanan y si e hotel aki ta bay door of otro proyecto cu por tin den area aki manera nos a scucha caba, nos ta lamenta cu e parti arkeologico cu tabata di nos indjannan por bay perdi.”

Nan a mustra e preocupacion aki varios biaha na gobierno segun el a señala, “pero nunca nos no ta haya un reunion pa nos por splica tur cos,” el a bisa.

Ta p’esey e hospital di Lago nan a mester bash’e abao manera el a sigura, debi cu salpeter den area aki ta hopi fuerte y el a come e fundeshi cu tabatin hero, loke salpeter ta come. Un pregunta cu ta bin dilanti ta con nan ta trahando e hotel di Baby Beach riba e baranca aki, cu ta un area cu tin hopi salpeter, si e mesun DNM mes a traha un rapport cu ta indica cu e baranca aki ta saltspray (e salo ta pasa directamente riba e baranca)?

Pa esaki un construccion mester ta hopi bon y den caso di hotel, esey ta nifica gastonan halto pa mantencion, ademas bao e tereno aki di e baranca tambe tin salpeter cu por come e fundeshi.

E cantidad di hotel cu Aruba tin aworaki tampoco ta na su luga papiando di medio ambiente, debi cu Bislip ken ta experto den economia y turismo a señala cu “tin demasiado hotel y tur ta competi cu otro, den caso di e hotel di Baby Beach ta importante pa tene na cuenta cu ora e hotel nobo lo bini, tur e area ta bay hopi movecion, autonan, e trankilidad cu Baby Beach ta duna, esey ta loke turistanan ta bin pe,” el a declara.

Destruccion di neishi di shoco cu mester ta protegi pa ley tambe por tuma luga na unda el a sigura cu na e luga aki tin un cueba grandi y den un di nan tin un neishi di shoco caminda DNM mester a pone un borchi pa avisa pa no kibra e neishi.

Pa finalisa, Bislip ta enfatisa cu pa haci un desaroyo na un luga cu no tabatin desaroyo, a bin kibra e baranca cu e tunnel di awa cu ta abao “e pida ey ta pa loke nos ta lucha pe, nos no tin nada contra e desaroyo, pero nos mester cuida nos historia y nos rikesa natural.”

Algun di e potretnan aki ta riba Facebook Page di Fundacion Ambiental Aruba na unda ta mustra: e neishi di shoco cerca e area di construccion di hotel, con a tapa e viaductonan di tunnel di awa Mangel Cora Wells, tunnel di awa y e construccion mes di e hotel.