Pa conmemora luna di conscientisacion tocante prevencion di abuso di mucha
Manera ya ta conoci pa hopi aña caba, luna di april ta conoci como e luna di conscientisacion tocante prevencion di abuso di mucha. En conexion cu e conmemoracion aki, Fundacion Respeta Mi a lansa e campaña “Un Soño pa Aruba” pa asina crea mas conscientisacion ariba e topico aki.
Na Aruba, y mas cu claro rond mundo, hopi mucha ta sufri di diferente tipo di abuso, abuso fisico, emocional y sexual. Luna di conscientisacion tocante prevencion di abuso di mucha ta subraya e importancia pa para keto durante e luna aki y sigui enfoca riba prevencion.
Organisacion Mundial di Salud (OMS) ta defini abuso di mucha y maltrato di mucha como tur e formanan di maltrato fisico y/of emocional, abuso sexual, abandono of trato negligente, explotacion comercial of otro tipo cu ta resulta den un daño real of potencial pa e salud, superviviencia, desaroyo of dignidad di e mucha den e contexto di un relacion di responsabilidad, confiansa of poder.
Durante e luna di conscientisacion tocante prevencion di abuso di mucha comunidadnan mester dedica apoyo na e famianan y tin rol activo den e prevencion di abuso di mucha y negligencia infantil y tambe tuma medidanan positivo pa promove e bienestar di e mucha y su famia.
E manera pa por haci esaki ta pa involucra mas den esfuersonan di prevencion basa den comunidad, busca informacion tocante con pa preveni abuso y mantene e muchanan mas sigur. Un ehempel di esaki ta e diferente fundacionnan, como Fundacion Respeta Mi, Fundacion pa Nos Muchanan of Fundacion Mi Voz ta Bo Voz.
En conexion cu e conmemoracion di e luna aki, Fundacion Respeta Mi a anuncia ariba nan pagina di Facebook e campaña “Un Soño pa Aruba”, cu ta un campaña inicia door di studiantenan di SW&D na Universidad di Aruba, Marceylaine Paskel y Miguel Aceros. E campaña aki ta enfoca ariba participacion di scolnan pa asina yuda engrandece e tema di prevencion di abuso di mucha.
Pa participa den e campaña, e klas mester saca un potret bisti na blauw usando nan creatividad y treciendo e mensahe pa dilanti, pakico proteccion di mucha y hoben ta importante pa e klas. E klas ta manda e potret pa Fundacion Respeta Mi y e fundacion lo pone e potretnan aki riba Facebook pa e comunidad di Aruba por like, share and react.
Ta bay tin tres premio pa e tres potretnan cu mas like y reaccion. E prome premio ta, e klas ganador ta bay cinema na Gloria y nan lo haya popcorn cu refresco. Pa e di dos premio, e klas ta bay Philips Animal Garden y nan lo haya ice cream di Pico Bello y e di tres premio, e klas lo haya un treat di Subway.
Tur otro organisacion, instancia of entidad tambe ta mas cu bon bini pa bisti na blauw pa asina demostra e importancia di proteccion di mucha. Premionan lo wordo entrega solamente na klasnan di scol, traimerdia y centronan di cuido di mucha cu kier participa den campaña.
