Awe den corte di prome instancia ta tuma luga e tratamento di e caso contra Sr. S. Wilson, ken tabata e chauffeur cu a ocasiona e accident fatal na Seroe Colorado riba dia 2 di october 2022 cu a costa e bida di tres persona: dos adulto y un baby.
Un accident cu a sacudi Aruba completo. Riba diadomingo 2 di october 2022 pa un poco prome cu 11or di mainta na San Nicolas, e accident frontal a tuma luga riba caminda pa Sero Colorado. Tabata trata di un auto marca Nissan color preto cu a dal den un auto Chevrolet color cora.
Tres ambulance a presenta na e sitio pa atende cu e heridonan y Cuerpo di Bombero tambe tabata presente pa rescata e pasaheronan pega den auto. Cu urgencia e ambulancenan a sali rumbo pa hospital pa traslada un adulto y dos mucha.
E tres victimanan fatal tabata dos ruman muhe, Jenny y Carolina Wouters, y un baby di tres aña di edad, cu tabata yiu di un di rumannan. A keda confirma cu e chauffeur cu a ocasiona e accident tabata bao influencia di alcohol na momento cu el a ocasiona e accidente fatal aki.
Dia 12 di October 2022, 10 dia despues cu el a causa e accidente, S. Wilson a keda deteni y ta ser culpa di homicidio sin premeditacion, of homicidio culposo, pa e morto di e tres personanan cu tabata den e otro auto.
Motibo pakico e chauffeur a keda deteni te 10 dia despues cu e accidente a sucede ta pa motibo cu e mes a keda herida pa y mester a wordo traslada pa hospital. KPA a warda pa e recupera pa asina por a pasa over na haci detencion oficial.
Vocero di Ministerio Publico, Ann Angela, a confirma na Bon Dia Aruba cu S. Wilson, chauffeur cu a causa e accidente ta deteni desde october di 2022.
