(NLTimes)—Lunanan despues di negociacion, Secretaria di Estado Maarten van Ooijen (Ciudo hubenil) y e asociacion di municipionan Hulandes (VNG) a yega na un acuerdo riba principio di recorte y mehoracion den cuido hubenil. Ta bay recorte den e proximo añanan, pero menos cu Cabinet tabatin kier en principio. Awo cu e punto morto financiero a caba, tur partido envolvi por traha riba mas acuerdonan substantivo. E acuerdo principal ta bay wordo entrega na tur municipio pa aprobacion.
Inicialmente, gobierno tabata kier pa municipionan reduci 374 miyon euro riba cuido hubenil e aña aki, cual ta bay aumento cu 463 miyon euro otro aña y 570 miyon euro na 2025. Dialuna atardi, e Ministerio di Salud Publico, Bienestar y Deporte, conhuntamente cu VNG a dicidi pa recorta 374 miyon euro e aña aki, 2024 y 2025. Esey ta trece e cantidad di recorte plania durante tres aña na 285 miyon euro.
Segun e Secretaria di Estado, e recorte di presupuesto pa 2024 y 2025 ta bay permiti municipionan mehora cuido hubenil den circunstancianan social complica. “Reformanan ta necesario pa asina yuda muchanan y famianan vulnerabel na un manera mas lihe y miho.”
Mester a implementa e plan pa reformanan sistematico na januari 2022, incluyendo acuerdonan riba mehoracion y spaarmento den cuido hubenil. Negociacionnan riba reformanan den e sistema di cuido hubenil a experencia strobacion pa via di e falta di suficiente garantia for di gobierno nacional pa municipionan por si acaso e deficiencianan den cuido hubenil sigui.
VNG a conclui e acuerdo, pero si cu reservacionnan. Su miembronan, cual ta e municipionan di Hulanda, ainda mester ta di acuerdo cu esaki. Ta bay presenta e trato na e reunion di miembronan di VNG den juni.
Ademas, municipionan kier garantia lo mas pronto posibel tocante “recursonan financiero structural pa cuido hubenil pa 2026,” segun Consehal di Helmond, Cathalijne Dortmans, kende a conduci e negociacion di parti VNG cu e Ministerio di Salud, Bienestar y Deporte.
Dormans a bisa cu e ta satisfecho cu e recorte den e proximo añanan a calma. “Tabata un proceso dificil, pero nos a haci esaki pa nos hobennan.” Na 2026, municipionan mester haci un recorte riba cuido hubenil cu 961 miyon euro.
Ta bay tin un comision di experto envolvi den e proceso. Na 2025, e comision aki ta bay examina si e recortenan di presupuesto ta realistico. Si esaki no ta e caso, e comision ta bay provee aviso tocante con municipionan y gobierno nacional mester aborda esaki.
