Ayera tardi den un conferencia di prensa, Mary-Ann Falconi, General Manager di Impact Hub Aruba, hunto cu Sr. Ivan Diaz, a anuncia e evento “Downtown Goes Orange cu lo tuma luga dia 27 di april en conexion cu celebracion di dia di Rey.
Falconi a splica cu un biaha mas conhuntamente cu partnernan di area comercial di Weststraat nan ta organisando otro evento cu e proposito pa yuda revitalisa centro di Oranjestad.
“Downtown Reinventa”, Falconi a indica, ta un iniciativa na unda e partnernan ta traha boluntariamente, cu un proposito hopi mas grandi cu nan mes, cual ta aporta na revitalisacion di centro di Oranjestad completo. “Nos ta spera cu no ta aki so, pero otro areanan di Oranjestad cu por tuma e formato aki over. Asina hunto nos por bin cu un solucion duradero pa e inciativa aki,” el a expresa.
El a recorda cu na november aña pasa tabatin e evento “Downtown Food & Art Festival” cu tabata prome iniciativa di e plataforma “Downtown Reinventa” unda cu propietarionan den e area di Weststraat a uni pa asina hunto bin cu un solucion pa area di Weststraat y a traves di esaki por stimula comercio, stimula comunidad pa medio di arte y experiencia y tambe e parti gastronomico pa trece otro bida pa e area di Weststraat.
Dia 27 di april Impact Hub hunto cu su partnernan ta bay tin e evento ‘Downtown Goes Orange”. E evento aki, Falconi a sigui splica, ta e prome di un serie di eventonan cu nan kier haci regularmente, idealmente cada luna, pa asina por tin sostenibilidad den e area di Weststraat.
Durante e evento aki ta bay tin diferente kiosk cu benta di artesania, diferente producto, benta di cuminda, ta bay tin tambe diferente pop-up restaurant presente pa asina aporta na un ambiente fenomenal pa celebra dia di Rey.
Ivan Diaz, partner di Impact Hub Aruba, a splica pa loke ta e aspecto di entretenimento ta bay tin diferente acto musical, entre otro DJ Caleto, e banda musical Acustica y e sorpresa di un artista nobo cu lo haci su debut y cu lo presenta pa añadi na e experiencia.
Por ultimo, Falconi y Diaz a extende nan invitacion pa pueblo di Aruba pa pasa, for di 7or di anochi, na Weststraat, entrada ta completamente gratis, pa asina yuda cu e iniciativa pa revitalisa e area comercial di Weststraat.
