(Reuters) – Ayera diamars, Ucrania a invita e presidente Brasileño, Luiz Inacio Lula da Silva pa bishita e pais cu ta aisla pa e guera y pa e por comproba pa su mes e consecuencianan di e invasion Ruso, na tempo tambe a critica su esfuerso pa concilia di dialogonan di paz.

E invitacion a produci un dia despues cu minister di Asuntonan Exterior Ruso, Sergei Lavrov, a bishita Lula na Brasilia y a comenta e opinion comparti cu Brazil y Rusia tocante e conflicto, cu tin mas di un aña caba.

Vocero di Ministerio di Asuntonan Exterior Ucraniano, Oleg Nikolenko a confirma riba rednan social e invitacion pa Lula bishita Kiev “pa compronde e causanan real di e agresion Ruso y su consecuencianan pa seguridad mundial.”

Nikolenko a bisa cu Ucrania ta sigui cu interes e esfuersonan di Lula pa haya un solucion pa e guera, pero no ta acepta “cu e victima y agresor” lo ricibi e mesun trato.

Tambe a rechasa cu “paisnan cu ta yuda Ucrania pa defende su mes di un agresion mortal ta bay wordo acusa di fomenta e guera,” un referencia di e comentarionan di Lula fin di siman ultimo, ora a acusa Merca y Union Europeo di prolonga e conflicto suministrando arma na e Ucranianonan.

E comentarionan di Lula a provoca un tormenta entre aliadonan occidental.

Un vocero di Cas Blanco a acusa Lula di “ripiti como loro un propaganda Ruso y Chines sin wak e hechonan.”

Union Europeo tambe a rechasa e sugerencia di Lula cu tanto Ucrania como Rusia ta culpabel di e guera. E portavos di Asuntonan Exterior di UE, Peter Stano, a bisa cu tur ayudo tabata destina na “defensa legitimo” di Ucrania.

Lula a ofrece su mes como mediador den combersacionnan di paz pa pone fin na e conflicto di Ucrania, cu a cuminsa ora Rusia a invadi e pais bisiña na februari di 2022. Su proposicion, basa den tradicion Brasileño di no interveni y diplomacia habri, ta boga pa un grupo di paisnan no implica den e guera cuminsa tene dialogo di paz cu Rusia y Ucrania.

Kremlin apoya den declaracionnan di Lula tocante e necesidad di haya un grupo di pais pa ta mediador den combersacionnan di paz y Lavrov a gradici dialuna ultimo e esfuersonan di Brazil.

Pero entre e paisnan occidental, te awor, solamente presidente Frances, Emmanuel Macron a acoge cu satisfaccion e iniciativa di paz di e mandatario di e mayor economia di Latino America.