Un o cinco aña di castigo… Berguenza den Staten ta sigui…

Ta dificil pa argumenta cu e veredicto den caso Avestruz tabata un exito rotundo pa Mimisterio Publico. Esey principalmente pa e castigo relativamente leve cu e sospechoso principal, e actual parlamentario pa e partido grandi opositor, a haya. En efecto, tabatin varios otro persona cu supuestamente tabata opera den coordinacion y bao su guia, cu a haya castigo di prison dos biaha mas halto.

Esaki sin mas ta un situacion excepcional, pasobra den e tipo di caso aki, di cual autoridadnan hudicial mes tabata bisa cu e tabata e cabez di un organizacion criminal, normalmente lo a bin corte cu prueba palpable. Aparentemente, y en todo caso pa e huez cu mester a huzga, riba varios punto e pruebanan presenta no tabata di tal peso pa por impone e castigo total manera proponi pa Ministerio Publico. Cu esaki, y pa tur claridad, a impone finalmente un castigo di un aña y prohibicion di ocupa cualkier puesto publico pa cinco aña. Sigur e ultimo parti aki no ta un castigo leve pa un politico.

Cu e resultado aki ta parce logico cu ambos banda lo apela e sentencia aki. Ministerio Publico pasobra nan no por ta contento cu e resultado aki, y defensa di e ex-ministro pasobra ta sinti cu e acusacionnan cu si huez a haya proba, ta di tal indole cu tin perspectiva den apelacion pa yega na un absolvencia completo. Tempo lo dicidi esey. Importante ta awor pa valora e situacion despues di e veredicto aki, pa opinion publico en general y e situacion interno den e partido na cual e parlamentario ta pertenece.

Pa cuminza cu e promer aki, nos ta sinti cu opinion publico lo no cambia tanto. Esnan cu tabata haya cu e politico ta corupto y mester paga pa su delitonan, ta keda cu e opinion y e condena, aunke menos cu a anticipa, ta indica culpabilidad. Y cinco aña cu bo no por ta den ningun puesto oficial ta e castigo ora ta considera bo un riesgo y menaza pa Pais Aruba. Pa esnan cu desde inicio a apoya e ex-ministro den su defensa, lo mira den e resultado un posibilidad pa rehabilitacion completo y no lo stop di apoya su persona.

Esey ta haci cu e miembronan cu ultimamente a cuminza vocifera un rumbo nobo den e partido probablemente lo mester dicidi si nan ta keda keto, o bandona fila di e partido. Nos no ta mira como realistico cu un parti grandi di e partido ta haya cu mester haci un ‘opruiming’ interno y cu mester reconoce cualkier tipo di culpabilidad pa tur loke a sucede den ultimo añanan. Ademas, no ta trata di cualkier miembro di partido, sino di e politico cu ta representa e bario considera cuna di e partido. Ta di anticipa cu e apoyo ey lo keda semper, ‘no matter what’.

Aki nos por mira cierto similaridad cu e caso di ex-presidente Donald Trump, unda e base di apoyo semper lo keda apoya, hasta si un o mas caso penal contra su persona termina di mal manera p’e. Esey riba su mes ta logico y no tin nada straño cune. Sin embargo, ora ta papia perspectiva politico, tanto pa e persona condena y pa e partido mes, loke e base di apoyo ta pensa ta bira menos relevante. Loke ta importante ta con e resto di Aruba ta pensa. Y esey nos por a mira caba den eleccion di 2017 y 2021, unda en total e partido a perde alrededor di 15.000 voto; aspecto cu e parlamentario catedratico di e partido a trece dilanti como su preocupacion recientemente. Manera bisa caba, nos no ta anticipa un declaracion di e partido na fabor di ‘integridad’ manera e parlamentario ta recomenda, y cu lo simplemente sigui cu bida ‘manera nada no a pasa’. Pero ki efecto esey lo bay tin pa e proximo eleccion, pasobra pa cualkier partido politico, esey ta e ‘razon de ser’? Aki atrobe nos ta mira paralelo cu e situacion Mericano, unda apoyo absolutamente incondicional pa Trump tin como consecuencia cu hamas partido Republicano lo logra gana voto di e personanan independiente den centro politico, y consecuentemente lo no gana eleccion tampoco.

Aki na Aruba nos por imagina esey tambe, cu poco consecuencia den forma di salida di persona for di e partido a corto plazo, pero cu consecuencia electoral bastante grandi. Y esaki pa un motibo mas. Apelacion den e caso penal aki lo core su ruta durante e proximo dos aña sigur, y lo hiba nos cerca di eleccion na 2025, si no sucede nada otro cu por causa eleccion mas tempran. Independiente di e resultado di e siguiente caso(nan), e lo no ta un punto positivo pa campaña cu credibilidad, dunando un bentaha grandi na e otro partidonan, cu cada biaha por mustra riba e hecho cu e partido no tin ningun intencion di haci un ‘restart’ moral. Y pa corona obra, e persona en cuestion mes lo keda den parlamento, te dia cu tin un condena ireversible. Ya cu e mes ta tuma como punto di salida cu e por keda completamente liber di tur acusacion, e lo no ria y su partido tampoco. E proximo añanan, e circo bergonzoso den parlamento lo no cambia, y Aruba ta keda hinca cu e berguenza cu no a percura pa ley, manera un pais drechi, cu ta impedi politico keda sinta den parlamento te dia pasa busca nan pa bay KIA…