Fundacion Respeta Mi por medio di nan stagiaire, Marceylaine Paskel y Miguel Aceros, ken ta studiantenan di segundo aña di Social Work and Development na Universidad di Aruba, ta invita comunidad henter pa participa dia 21 di april den campaña di conscientisacion pa preveni abuso di mucha.

“Un Soño pa Aruba” ta un campaña cu nan ta haciendo conhuntamente cu Fundacion Respeta Mi pa lo cual ta prevencion ya cu luna di april ta e luna di prevencion di abuso di mucha y e ora ey nan a presenta e idea pa haci cu dia 21 di april tanto muchanan, hobennan, hende profesional, entre otro, por bisti na blauw pa asina cu nan creatividad por mustra cu nan ta contra abuso di mucha, manera Paskel a señala.

E campaña ta consisti di saca un potret cu un prenda di bisti color blauw y manda esey na Fundacion Respeta Mi su Whatsapp cu ta e number 564.0270 caminda nan lo post tur e potret cu ta bay manda na nan number di telefon riba e Facebook page di e fundacion, ta bay tin premionan pa e potret cu lo haya mas like and share.

Di su parti, Miguel Aceros a sigura cu e obhetivo di e proyecto aki ta pa trece mas conscientisacion den comunidad pa e topico di abuso di mucha y su prevencion, Aceros ta di opinion cu “por ta tin biaha cu un persona tin un idea di kico abuso ta, pero tambe tin otro persona cu tin otro idea, diferente cosnan cu por caracterisa como abuso, manera abuso sexual, abuso fisico, abuso emocional, negligencia, si e mucha ta wak cu tin violencia domestico na cas, esey tambe ta conta como abuso.”

Organisacionnan, klasnan di scol, traimerdia y centronan di cuido a cuminsa reacciona caba y nan ta preparando pa dia 21 di april tur mucha por participa den esaki pa gana premio como bay cinema, bishita Philips Animal Garden, entre otro.

Paskel como futuro trahado social ta haya cu Aruba ta encontra su mes cu hopi abuso di mucha y “nos tin cu pone aworaki e enfoke pa termina esaki y prevencion ta e miho solucion,” el a señala.

Di su parti, Aceros a bisa cu “ainda e topico di abuso en general na Aruba ta algo cu hopi hende ta prefera di no papia di dje, tin biaha e ta pone un persona sinti inconfortabel lo cual ta comprendibel, pero e ta bon si pa para keto y tende de historia di diferente hendenan cu a bay den abuso, reflexiona di esaki y pone e persona pa sinti e historianan ey y crea prevencion.”

Pa dia 24 di april nan ta bay saca e grupo ganado di e premionan, unda nan a gradici nan sponsornan pa yuda nan den proyecto aki.

Importante ta pa destaca cu mester pidi consentimento di e muchanan prome cu nan saca potret, si nan no kier ta ariba e potret, respeta esaki.