Pildo estilo “morning-after pill” por yuda infeccionnan sexualmente transmiti

(YahooNews)—Oficialnan di salud na Merca a publica data diamars cu ta mustra con casonan di clamidia, gonorrea y sifilis ta aumentando rapidamente, pero dokternan ta spera cu un medicamento bieu lo por yuda combati infeccionnan sexualmente transmiti.

Expertonan ta kere cu tipo di infeccionnan aki ta aumentando pa via di un reduccion den uzo di condom, educacion insuficiente tocante sexo y un reduccion den test durante e pandemia. Pa purba cambia esaki, hopi dokter ta mira antibiotica barata doxycycline como un bon solucion pa infeccionnan.

CDC ta creando recomendacionnan pa uza esaki como un “morning-after pill” pa preveni infeccion, segun Dr. Leandro Mena, ken ta director di e division di infeccionnan sexualmente transmiti pa e agencia. E droga ta wordo uza caba pa trata diferente infeccionnan. Un estudio publica siman pasa a mustra su potencial pa preveni infeccionnan sexualmente transmiti.

Den e estudio, 500 hombernan homosexual, bisexual y muhenan transgenero na Merca a tuma un pildo di doxycycline dentro di 72 ora despues di tin relacion sexual sin proteccion. Esnan cu a tuma e pildo tabatin 90% menos riesgo pa contrata clamidia, 80% menos riesgo pa contrata sifilis y mas cu 50% menos riesgo pa contrata gonorrea, compara cu esnan cu no a tuma e pildo, segun investigadonan a descubri.

“Nos mester acercamentonan y innovacionnan nobo si” pa yuda controla e tipo di infeccionnan asina, segun Dr. Philip Andrew Chan, ken ta consultando cu CDC tocante e recomendacionnan. Uzando e antibiotica pa preveni e tipo di infeccionnan aki “no ta bay ta un bala magico, pero si e ta bay ta un otro herment,” Chan a bisa.

Expertonan a nota cu CDC lo tin hopi factor pa pesa mientras cu e ta desaroyando e recomendacionnan. Entre otro: e droga por causa efectonan manera problema cu stoma y erupcionnan den cuero despues di exposicion pa solo. Algun investigacion a descubri cu e droga no a efectivo pa hende muhe heterosexual, y uzo di e pildo riba scala grandi como un medida preventivo por contribui na mutacionnan cu ta haci bacteria mas resistente contra e droga, mescos cu a pasa cu otro antibiotica den pasado.

Asina mes, Departamento di Salud Publico na San Francisco a bira e prome departamento di salud na Merca pa distribui guia tocante doxycycline como un medida pa preveni infeccion. Otro clinica ta recomendando antibiotica pa pashentnan cu por tin riesgo mas halto.